فارس قديم

احلام و أوهام و أمنيات .. أليست كل المبادىء كذلك ..؟ حتى أخلاقيات الفرسان

Name:
Location: cairo, Egypt

قد أكون أكبر المدونين سنا ..ما أكتبه هنا بدأته منذ سنوات فى دفاترى .. كتبت لنفسى .. و لأولادى حين يستطيعوا استيعاب ماكتبت .. رأيت أن لامانع من نشر بعض مافى الدفاتر .. فى حريه تااااامه

Wednesday, May 04, 2016

ترانيم مصريه

يا اهل الله يا أوليا يا مرصعين ارض مصر
يا سيد الشهدا يا حسين .
. يا مارجرجس يا دابح التنين برمحك ..
يا رفاعى يا حابس الحنش فى كفك ..
يا شيخ العرب يا جايب الأسرى بسيفك ..
يا ابو العباس يا مرسى يا الى بتأمر موج البحر يطيعك ..
يا ست دميانه ..
يا أم العواجز يا رئيسة الديوان ..
يا نفيسة العلم
يا أنبا انطونيوس يا مسخر الطير ينقل رغيف الخبز لأخوك بولا فى الجبل
يا سيدى العارف يا حابس التمساح فى النيل ما يعدى سوهاج أبدا
يا ياقوت العرش يالى بترفع أدانك مع الملايكه ..
يا على يا زين العابدين
يا ابراهيم يا دسوقى
يا سمعان يا خراز
يا اهل الله يا مرصعين ارض مصر كما الجواهر فى التاج
يا أم النور يا الى احتميتى بأرض اجدادى و ارتويتى من نيل بلادى .. أنا حفيد أول مين ناولك رغيف الخبز و جرة الميه .. ما هو الى ضايفك يبقى جدى
يا سيدى المسيح يا ساكن العلالى .. انا من شعبك الى قلت عليه مبارك شعبى مصر
يا سيدى المصطفى يا محمد عليك صلاة الله .. استحلفك بغلاوة ابنك ابراهيم من رحم جدتى ماريا القبطيه .. انا خال ولادك يا سيدى يا رسول الله .. ما هى ماريا تبقى جدتى لأبويا و تبقى عمة امى ..
يا كل الواصلين يا حبايب المصريين
انتو غالين على مصر .. و مصر غاليه عليكم .. اتوسل بيكم يا أهل الله يا اصحاب الطريق يا واصلين ..
أحمو الحدود بالحديد .. و ابعتو الخير مع الخيل
اقفو جماعه على عتبة الرحمن و اطلبو لبلادى الأمان .. و استرحمو المولى علينا ..و اطلبو منه النصر لينا .. و الفتح بعبد الفتاح
و الله المستعان

0 Comments:

Post a Comment

Links to this post:

Create a Link

<< Home