فارس قديم

احلام و أوهام و أمنيات .. أليست كل المبادىء كذلك ..؟ حتى أخلاقيات الفرسان

Name:
Location: cairo, Egypt

قد أكون أكبر المدونين سنا ..ما أكتبه هنا بدأته منذ سنوات فى دفاترى .. كتبت لنفسى .. و لأولادى حين يستطيعوا استيعاب ماكتبت .. رأيت أن لامانع من نشر بعض مافى الدفاتر .. فى حريه تااااامه

Sunday, June 25, 2006

الجيرل فريند بتاعتى

ِالجمعه اللى فاتت .. أكرم كان مشغول جدا فى تدريباته .. البطوله قربت .. قلت فرصه أخرج مع البت نور لوحدنا .. و قد كان .. قابلتها فى النادى .. و من النادى على تشيزا .. أتغدينا و قعدنا نرغى .. و نتكلم .. و نتكلم .. و نتكلم ..البنت كبرت ماشاء الله .. و الحوار بيننا بقى أقرب لحوار الأصدقاء منه لحوار أب و بنته .. على المغرب خرجنا نتسكع فى وسط البلد .. البنت طولى تقريبا .. و انا ماشى واخدها فى أيدى .. حسيت أنى فخور قوى .. كلمنى شريكى فى العمل على التليفون و انا معاها .. بيسألنى أنت فين .ز لقيتنى مبتسم جدا و انا باقوله خارج مع بت زى القمر بنتمشى .. هاهاهاه كان هايجيله القلب ساعتها
المهم .. تسكعنا و أخدتنا رجلينا على مكتبة سندباد .. عمر قناوى قام بواجب الضيافه .. و تشربوا ايه و أجيبلك ايه ياعروسه .. و أنتى شرفتى المكتبه .. و أجازة الصيف بقى لا زم تقرى .. و هوب .. قام ابن الئيمه باعلها كتب بخمسين جنيه مره واحده .. و ادفع يا بابا .. الله يخرب بيت معرفتك ياعمر
من المكتبه تمشه لليونانى .. جو حر .. فى الطريق قابلنا أدهم الصفتى المخرج السينيمائى الناشىء و كنت فرحان قوى و انا باقول للناس نور بنتى .. طول الطريق و الكلام لم ينقطع بيننا .. الجارسونات ابتدوا يسلموا عليها باحترام مبالغ كأنها واحده صاحبتى أول مره تيجى معايا و انا بصراحه كنت فرحان .. أخيرا من مده طويله باخرج مع واحده و بتمسك ايدى و احنا ماشيين .. هاهاهاهه .. بس قلت مالوش لزوم أقطع على نفسى .ز أحسن الناس تنشر الخبر أنى ارتبطت ولا حاجه .. و اقفل على روحى .. قمت عرفتهم بيها .. بنتى .. نور .. جميل قوى أنى أخرج فى المجتمع كأب .. و هى كمان استمتعت جدا بالخروج
باليل .. و نظرا لظروفى الماديه الحاليه ماعنديش عربيه .. ركبنا تاكسى وصلتها لبيت والدتها .. و روحت .. شاعر بامتلاء .. شبع أنسانى ..و رضا عاطفى .. ارتواء حقيقى .. كأنى كنت خارج مع ستين جيرل فريند مش واحده بس .. ..

15 Comments:

Blogger ايمان said...

شعور جميل ان تري ابنتك أو ابنك و هم مقبلون علي الشباب، تختلط المشاعر بين الفرحة و الدهشة و الاعجاب، فهذا طفلي الذي كنت احمله اينما ذهبت، يمشي بجواري كشاب وسيم ، عندما لمحت ابني و هو يبتعد عني عابرا الشارع امامي، خفق قلبي بشدة ، حبيبي علي مشارف الشباب، رغم صغر سنه الا انه يدهشني كل مرة كم هو عميق، لك ان تفرح بنور و تزهو بها، اعرف هذا الاحساس الجميل، الذي يمحو كثير من العذابات

11:29 AM  
Blogger lastknight said...

أيمان .. أين أنت ؟ و على مدونتك حوار ساخنت بدأتيه حول الوهابيه ثم أختفيتى .. لعل المانع خير .. و ربنا يباركلك فى العريس .. فعلا شعور جميل أن الواحد يشوف امتداده بيكبر قدامه .. بيتكون .. بيكون له شخصيه .. ربنا يحميهم جميعا

3:58 PM  
Blogger ايمان said...

صباح الخير
الحفل مزمع اقامته في خلال شهرين كحد اقصي من اليوم، لكننا نحضر له بشكل يليق بموهبة و عطاء الرجل، الذي ترك الهندسة و تفرغ بالتنقيب و توثيق التراث الموسيقي النوبي، لمدة اربعين عاما واهبا نفسه لهذه المهمة و متفرغا كأستاذ للموسيقي في جامعات الولايات المتحدة و استاذا لفسفة الموسيق الشرقية بجامعة طوكيو
انا لم اتدخل حتي اليوم في النقاش لسبب واحد ترك اكبر فرصة لاكبر عدد من الافكار المطروحة حتي اناقشها بشكل مستفيض و موثق و هو ما استطيعه اعتبارا من الاسبوع المقبل
اوافق طبعا علي طرح موضوع او قضية للمناقشة و لتكن سيطرة الوهابية علي العقول المصرية اولها

9:27 AM  
Anonymous اكـــــــــــــــــــــــــرام said...

سبقتني ايمان اليك؟؟؟؟ أه صار لك من يسبقني ..... يافرحتي بما تكتب.... فرحتي بنور اكثر من فرحتك بيها يمكن.... يديم المحبة وياريت الناس كلها تحس بهذا الشعور لانه وبلاشك يغسل القلوب

7:57 PM  
Blogger FrEe.PhArAoH said...

عزيزى الفارس
اتشرف انى فى مدونتك
اعجبت جدا بأسلوبك بالفعل واتمنى من الله ان يحفظ لك ابنتك ويهديها الى سواء السبيل .. جل ما اريد منك هو التواصل بعد ما دار بيننا من حوار .. وادام الله عليك التفتح والسماحه
حقا انت كبير المقام .. والسن :)

12:26 AM  
Blogger lastknight said...

الغليه العراقيه أكرام .. أنتى اللى كسوله .. و تتأخرى فى التعليق.. المهم حمدا لله على السلامه على العوده من البصره .. طمنينى على الأهل جميعا .. و بالنيابه عن أيمان أدعوك ألى حفله موسيقيه جارى الأعداد لها خلال الشهرين القادمين .. شدى حيلك و تعالى نورى القاهر بوجودك .. و متأكد أنى أقدر أدبر مقابلات لك مع كل المدونين الذين تقرأين لهم هنا
الفرعون الحر .. شرفتنى .. فعلا .. و أتمنى دوام التواصل و مشارطتك دائما معنا .. حضورك فعلا هام

3:04 AM  
Blogger المزاجنجي said...

عزيزي الفارس القديم اولا شكرا لك على مرورك على مدونتي وفعلا انت شخص رائع جدا ولكن احب اقولك سر انت عارف ان انا من زمااااااااااان قوي حصل لي مشاكل وبلاوي ومصايب وعمري ما بكيت وكنت دايما اقول ان انا ربنا خلقني من غير دموع حتى في وفاة والدي من 7 سنين لم تنزل مني دمعة عين واحدة لكن من 43 يوم بالضبط مات حلمي الكبير اللي سعادتك نبشته لي من جديد ولاول مرة اعرف الدموع الصمتة التي تخرج من عيني بدون اذن مني انه يوم وفاة ابنتي الكبيرة 14.6 وكانت كل امالي في الحياة وكنت دائما اتحدث معها واقول لها يا بيبو عاوزك تكبري علشان نخرج سوا ونتفسح سوا ونحب فبعض واكون انا الواد بتاعك وانت البنت بتاعتي كان امالي فيها كبيرة قوي ويوم ما توفاها الله بعد صراع اكتر من 4 سنين مع مرض في الدم بسبب ولاد الكلاب اللي بيحكمونا وياكلونا السموم بفلوسنا يومها بس نزلت اول دموع افتكرها في حياتي وبعدين دخلت عند الدكتور ابو ريشة واتكلم عن النكسة وايامها السودة لقيت نفسي برضه وكاني فرحان بتعلم البكاء ببكي لوحدي بدون شعور واليوم اقسم لك وانا صادق ان انا دموعي خرجت من غير بكاء لما تخيلتك انت ونور يا رب يا رب يا رب يحفظها لك وبفرحك بيها وتفرح كمان باولادها ولذلك كتبت لك ولو اني كنت حابب اني اقرأ مدونتك كلها لكن الموضوع ده عصر قلبي وقفلي دماغي وارغمنى على التعليق معلش هو تعليق طويل حبتين لكن معلش وعلى فكرة انا عندي بنتين تانين وولد بس انت عارف لما انت بتكون بتجهز مشروع حلم صعب قوي تفقده عموما انا لله وانا اليه راجعون وانا منتظر اني اشوفها في الجنة واشوفك انت بقى عالقهوة ولك تحياتي وانا اسف اني كنت كئيب معاك كام حبة مش حبتين ويا سيدي مش ناسي الدوم ومعمول حسابك ويارب تدوم الزيارات

4:07 AM  
Blogger lastknight said...

الحبيب من زماااان
ألبقاء لله .. , ربنا يعوض عليك و يصبرك و يتقبلها فى فسيح جناته .. و يجعل مصابك فيها باب الفرج عليك و على أهلك جميعا يوم الدين ..
انا دلوقتى اللى بكيت .. لكن الحمد لله بكاء فكرنى بقدرة الخالق علينا .. و نعمه .. و ربنا يصبرنا جميعا و ينتقم انتقام العزيز المقتدر من أولاد الكلب اللى بيسمموا أولادنا .. اللهم آمين
بلغنى أتل بيك ازاى و تعالى نرتب ميعاد على القهوه .. و تشرفنى أنت و كل المدونين أصدقائك .. يأمر الله تدوم المحبه و الخير

2:09 AM  
Anonymous Anonymous said...

من أفضل النعم التي أنعم الله علي بها هي أنك أبي...................
ربنا يخليك ليا يا بابا
ابنتك
نور

5:33 PM  
Blogger tota said...

الفارس
الله على الشعور الدافى والعلاقة الانسانية الجميلة
يا ريت فى اباء كثير مثلك يرون معنى اخر للابوة غير السيطرة
احببت هذه العلاقة جدا
ربنا يخليهالك هى واكرم
مع خالص تحياتى

12:01 PM  
Blogger lastknight said...

ألى توتا
شكرا

1:23 AM  
Blogger saso said...

هوا في احلي من كدة جيرل فريند ..انا لو مكانك اخدها معايا في كل حتة واقول للناس كلها عنها
قد اية حاجة تفرّح لما تلقي جزء منك بقي انسان كبير وجميل وباعث للسعادة كدة
فكرتني ببابا في مشاوير المكتبات .. لما كنت بادبسة في ارقام جميلة وميبقاش عارف يزعل مني ولا يفرح بيا

2:05 AM  
Blogger lastknight said...

شكرا يا ساسو .. و مدونتك شيقه بس للأسف اليومين دول ماعنديش وقت كافى أتابع .. لكن بأمر الله من الأسبوع الجاى أتابعك و أعلق عندك على مواضيعك

2:16 AM  
Blogger أميرة البلطجية said...

ساعات كتير كنت بسأل نفسي..ايه اللي يخلي العلاقة بين الاب وبنته اسطورية زي بعض الافلام والقصص
عرفت ليه بقي..في البوست اللي فاتت بتعتك
الحقيقة كلامك عن نور يمكن يكون فعلا من احلى -ان مكنش فعلا احلى- ما قرأت من مشاعر الاب لبنته
اتمني يوم ما يبقي عندي ولاد احسن احساس زي بتاعك
انت جميل فعلا

9:40 AM  
Blogger آميرة بهي الدين said...

ربنا يفرحك ببنتك
وينور لك حياتك بيها اكتر واكتر
----------
بس ااقولك سر
كل اب بيمشي مع بنته وجنبها بيحس انها الجيرل فريند بتاعته
ليه ؟؟؟؟؟؟؟؟؟
ابويا كان دايما يقولي كده ؟؟؟؟؟
يمكن لان الابهات عايزه تحس انهم شباب ونظريه الجيرل فريند دي بتبعد عنهم شبهه الكبر - يعني راجل كبير مش حاقول عجوز ماشي مع قمرايه اللي هي بنته - يبقي كده ميت فل وعشره !!!
علي العموم سيبك من الفلسفه - المهم ربنا يخلي البت ويفرحك بيها يارب العالمين

4:00 AM  

Post a Comment

Links to this post:

Create a Link

<< Home