زفت تانى .. مش قلتلكم ؟
أكتب لنفسى فقط .. كان هذا هو المبدأ الأساسى حين شرعت فى التدوين .. أسجل مواقف قد يطلع عليها أولادى فى المستقبل .. عموما
الزفت الجزء التانى من موضوع حزب الزفت المستقبل مش راضى يخلص , كل ما اكتب زفت مسوده اراجعها ألاقى نفسى كتبت كلام يودينى فى ستين داهيه بحكم الدستور بعد تعديله , احاول اصلح و انا أتابع الموضوع و تطوراته .. ألاقى الزفت الوضع بيتغير .. و بيبقى زفت أكتر .. كتبت زفت متابعه لموضوع مؤامرة أمريكا و سقوط النظام المصرى عند منابع النيل .. لقيتنى باكلم نفسى .. مش مهم .. أنا اصلا باكتب لنفسى ..
باقرا جريدة الدستور الأسبوعيه لقيت تحليل و تصور جميل لحركة التغير القادمه .. للصدفه البحته مطااااابق لتصورى عن التغير زى مانشرته من أسبوعين .. قلت الحمد لله .. عموما .. مايلى مجرد تسجيل /تدوين لخواطر مضطربه .. لكن أظنها قد تنفع فى المستقبل .. و لو لمجرد أنى أشير أليها و أقول .. مش قلتلكم ؟
_______
أولا : مؤامرة الزفت امريكا و اسرائيل على منابع الزفت النيل
سبق و أن اشرت ألى تحرك أمريكا فى اتجاه وسط أفريقيا و تطويقها لمنابع النيل , ودللت على ذلك بمايلى
أ- حركة المحاكم الأسلاميه فى الصومال و التى مهدت و بررت اجتياح القوات الأثيوبيه و الأريتريه للصومال من شماله ألى أقصى جنوبه .. و اللتحام المنسق مع القوات الكينيه , علما بأن اثيوبيا و أريتريا مرتبطتين باتفاقية دفاع مشترك مع أسرائيل ( يذكرنى الموقف بدور طالبان لتبرير توغل القوات الأمريكيه فى آسيا الوسطى و احتلالهم لأفغانستان و تكثيف وجودهم و تعاونهم مع باكستان ) , و كينيا تضم أكبر وجود استخباراتى أمريكى فى أفريقيا بعد حوادث تفجير السفارات المصريه و الأمريكيه هناك , و ربطت بين تواجد حلفاء أمريكا بكثافه فى كينيا و الجرأه المفاجئه لوزير الزراعه الكينى بأعلانه عن رفضه تجديد اتفاقية دول حوض النيل مع مصر , و مطالبته بتعديل الأتفاقيه
ب- نوهت أيضا عن الشجاعه و الثقه التى أعلنت بها وزيرة الرى الأوغنديه توقيع اتفاقيه جديده مع مصر لتنظيم الأستفاده من مياه النيل , و طبعا الأنكار الرسمى المصرى الخافت للخبر
ج- نوهت أيضا للخبر المنشور عن أعلان أمريكا عزمها لأقامة قاعده عسكريه عملاقه فى تشاد تسمى قيادة أفريقيا , و ترحيب التشاديين بها .. و صمت صر و السودان و ابن المجنونه بتاع ليبيا رغم أن وجود القاعده فى شرق تشاد يهدد الدول الثلاثه
اليوم .. طالعتنا نشرات الأخبار بأنباء عن شبه اجتياح تشادى لحدود السودانيه و سقوط قتلى من الجيش السودانى فى المواجهات .. و أستطيع بثقه بالغه أن أسمى مايحدث بأنه بدايه لغزو السودان من الغرب .. و أنبهر بشجاعة التشاديين المفاجئه .. كما انبهرت بجرأة الكينيين و وقاحة الأوغنديين .. و القاسم المشترك الأعظم بين كينيا و أوغندا و تشاد حاليا هو وجود تعاون وثيق يصل ألى التحالف العسكرى مع لأمريكيين .. وطبعا ابتسم لردود فعل السودان الكلاميه .. و أيضا رد فعل ابن المجنونه بتاع ليبيا . الذى سبق له تمويل الثوره فى أيرلندا و جبهة الهنود الحمر فى شمال أمريكا .. لحقهما بتفجيرات لوكربى .. ثم سداد الفديه صاغرا .. فالأنبطاح على وجهه مباعدا ساقيه قائلا .. فتشونيييييييييييييييييييي
___
المهم .. الصومال , كينيا , اوغندا , تشاد .. بعد أثيوبيا و قبلها اريتريا .. أعلن بكل ثقه .. بدأ الزحف الفعلى للسيطره على منابع اليل .. و بالشفا ان شاء الله
بالمناسبه .. وزير الزراعه أعلن اليوم أنه سيتم فرض غرامات على زراعة الأرز فى مصر تحسبا لنقص الموارد المائيه .. علما بأن صادرات الأرز المصرى تعتبر منذ فترة حكومة الجنزورى أكبر مورد للعمله الحره بعد السياحه و البترول و قناة السويس .. قشطه ؟
طيب ..خدوا دى كمان ..نشرت جريدة المصرين أنه بأوامر من المباحث الفيدراليه الأمريكيه تم استبعاد عدد من المدرسين المصريين الأزهريين فى كينيا بحجة تعاونهم مع الأرهاب .. تقدروا تراجعوا التفاصيل هنا .. و أضيف من عندى أن جزء من المصريين الرسميين فى كينيا هم ببساطه متعاونين مع جهاز الأمن القومى المصرى .. مهمتهم وطنيه للغايه .. غرضها الأصلى هو مراقبة الأحداث قرب منابع النيل .. طبعا أقدر اتوقع أن المدرسين المستبعدين هم من عملاء المخابرات المصريه هناك .. و يتم أخلاء الساحه الكينيه منهم لتسهيل و تحرير الحركه الأسرائيليه و الأمريكيه هناك .. و طبعا رد الفعل المصرى الرسمى .. يشبه صوت الفساء الخافت .. و رائحته أيضا
__________
ثانيا : حركة الزفت التغيير السياسى فى مصر بعد الزفت التعديلات الدستوريه
فى جريدة الدستور الصادره اليوم لاحظت أن فى الصفحه السابعه تحقيق يرشح القضاه لقيادة التغيير القادم بأمر الله ( اذا كان لينا عمر ) و انشكحت جدا من التحقيق .. لأن الفكره مش غريبه عليا ..و قعدت افكر قريت الكلام ده فين يا فارس ؟ قريت الكلام ده فين يا فارس ؟؟ ايوه .. فى المدونه دى .. بتاعتى .. اللى أنا كاتبها بأيدى اللى تستاهل قطعها .. كانت بعنوان تلاعب التلاعب .. و الحل المطروح فى نهايتها كان بيقول أن القضاه هم من يجب أن يتحركوا ليقودوا التغيير .. مدونتى كانت بتاريخ 19 مارس .. و تحقيق الدستور منشور بتاريخ اليوم 11 أبريل
لا أشتبه أبدا فى الأقتباس أو النقل .. بل أرى أن الفكره من الوضوح لتفرض نفسها على كل محلل مدقق .. و اسجل لنفسى هنا سبق الأعلان عن الفكره قبل الدستور .. لا لغرض سوى المنظره قدام ولادى لما يكبروا و يشوفوا ابوهم كان بيعمل أيه .. و اسرح و اتخيل الواد و البت واقفين يهللوا .. بص شوف ..بابا بيعمل أيه .. يااااسلاااااااااااااااااااااااااام
_________
أخيرا .. نفسى اوفى بوعدى و اكمل الجزء التانى من الموضوع الأسبق .ز بتاع حزب جمال مبارك .. فعلا دمى بيفور و باكتب كلام مش ممكن يتنشر .. او اعدل الكتابه ألاقيها مش ماليه دماغى .. مش عارف اعمل ايه .. بس عموما .. هى كباية شاى بنعناع .. و اقعد اكتب تانى .. و ان شاء الله أوفى بوعدى قريب
posted by lastknight | 2:32 AM
32 Comments:
أنا مش فاهمة أنت ليه حارق دمك
أولا:السيناريو تاع أمريكا و إسرائيل و منابع النيل معروف من وقت ما بريطانيا عرضت أوغندا كوطن قومي لليهود لكن الصهاينة فضلوا فلسطين يعني الجماعة عندن بعد نظر وكانوا عارفين راح يوصلوا لأوغندا ولمنابع النيل عاجلا أم آجلا و نحنا عنا عمى قلب ونظر كامل و شامل ما عم نقدر نشوف حاضرنا لنشوف المستقبل
تانيا: طلعت منيحه بحقك هيك أنت سبقت بالسيناريو بس طول بالك شوي لنشوف لوين رايحين القضاة هيدا إذا كانوا ناويين يروحوا لشي محل بعدنا في مرحلة الأمنيات
كلة زفت في زفت , هذة المنطقة اصبحت مسرح لسيناريو معروف مسبقا
أستاذ إيهاب
أنا باتابع كتاباتك
لكن برضه مش عارفة أقول حاجة
بجد
أنا شايفة الحفرة اللي رايحينلها برجلينا
يسموها المستقبل يسموها الجنة
هيّا حفرة
هاوية بالأصح
والكل مغمّي عنيه وماشي في إتجاهها عاااادي جداً
بالنسبة لما يُسمى بحقوق النشر وأسبقيته
أحب أقولك إن السيد عمرو الليثي
كتاباته في الأهرام بقراها على المدونات الأول
يآخد الفكرة ويعيد تظبيطها على اللي هوه عايز يقوله
وأنشر يا أهرام
حاول أن تهدأ يا سيدي الفاضل
أن تهدأ لا أن تصمت
تحياتي ليك
باحييك فعلا على تحليلاتك وكتاباتك رغم اختلافى -نادرا- مع بعض ماتكتب إلا أن مجهودك وعمق كتاباتك واضح ويستحق الثناء والتحية بكل تأكيد ..
بيتهيألى إن الموضوع ده مش هيقف .. وإن مبارك وابنه هيفضلوا يورّطوا البلد ويضيّعوا فى حقوقنا لحد ماتبوظ خالص ومايفضلش للى هييجى بعدهم وسيله غير الحرب ..
حاجه كده زى عبدالناصر لما اضطر يأمم القناة وبعدها جت حرب 56 ..
ممكن تكون حرب بيننا وبين وكلاء أمريكا واسرائيل .. ممكن تكون مباشره ضد اسرائيل .. ومين عارف
ممكن تكون بداية الحرب العالمية الثالثة من عندنا هنا !
واسعه شويه ؟
يمكن, بس بالصوره اللى بيزيد فيها تيار العنصريه والكراهية فى العالم كله دلوقتى مش بعيده قوى ..خصوصا وإن اللى بياخدوا القرارات ناس من عينة جورج بوش !
فى انتظار الجزء الثانى من قصة الحزب الموعود .. وربنا معاك :)
mn-majhool
dear lastknight
wallahy mesh 3arf a2ol eah el mosta2bl shaklo fazee3 we kol youm aw7ash mn el tany
mesh 3arf e7na ray7een 3lz feen
rbna ystor shaklha 7ateb2a soda awy
bs bardo lesa feh aml
ymkn kteer nefsohm fe el aml da
yemkn netghayer
yaaaaaaaah
emta bs
...
plz
matez3lsh we matb2ash mahmom
lw ma katabtsh we gherk ma katabsh
3omrna ma 7ntghyr
....
t3ala 3ndy fe mawdo3 yehmny ra2yak feh
...
domt be sa3ada
sorry for writing in english or frankoarbic
coz ana on eng typing keyboard
regards
يا فارس يا خويا بالراحة على نفسك انت راجل كبارة وعندك عيال وطول مالزفت ده قاعد واحنا حالنا بيتغير من زفت لزفت وقال ايه آخر المتمة الزفت الصغير عايز يعمل زفت حزب هو احنا يعنى كنا ناقصين زفت احزاب ما هم أكتر من الزفت على القلب وعمرهم ماتزفتوا عملوا حاجة جاهم زفت ياخدهم كلهم خلى البلد تنضف
أرجو أن تكون بخير!!!
سيناريو المياه معروف من زمان والمقصود منه وضعنا فى موقف حرج لاجبار مصر على توصيل مياه النيل لأسرائيل واعطائها حصة منه ان لم يكن برغبتنا فسوف يكون رغما عن انفنا كل ده بيحصل وها يحصل طبعا والسادة الاكابر بتوعنا يتغافلون عن مجريات الامور وهم عارفين وعالمين تمام العلم بهذا المخطط وبعدين يا عم الجماعة بتوعنا كتر خيرهم هايتحملوا ايه ولا ايه هم فاضيين للكلام الفاضى ده كفاية موضوع العرش والوراثة والجماعة الغلباوية اللى بيتكلموا دول كان الله بالعون
فعلا سيناريو مدروس مش قادرين نخلص منه
وحنا بنلعب ادورنا علي المسرح الامريكي بأراده امريكه وتخطيط صهيوني
ربنا ينقذنا يارب من الي جاي
تحياتي سيدي العزيز
مش كفاية كدة على بوست الزفت دة؟
بقاله كتير
*************
عود الى آتووون
انته فين يا فارس
عودي يا قديم يا ابني
عووووووووووووود
للأسف ....
كل زفت وله زفت حل
الا الزفت اللي احنا فيه
ربنا يستر!
لا حول ولا قوة الا بالله هو كل حاجة زفت زفت مفيش اطران خالص هو احنا ناقصين , عموما انا هدور لك على حاجة تانية اقراها لك غير الزفت ده اللى احنا كلنا شاربين منه ... سلام ... يارب ألاقى حاجة تانية أقراها
ايهاب باشا
انت فين؟؟
مره أخرى أجدنى فى موقف أكرهه تماما .. موقف المخطىء الذى يحق عليه الأعتذار .. خطئى هو تأخرى فى التعقيب على تعليقات الأصدقاء الأحباء .. لا سبب يبرر خطيئة البعد عن الأصدقاء .. لكن ماحدث ببساطه هو أنى حاولت و مازلت أحاول كتابة الجزء الثانى من الأعترافات حول حزب الغد و المستقبل .. و كلما كتبت كلما تعمقت فى ذكريات و أفكار مؤلمه بحده .. و بعد أن أكتب أراجع ماكتبت .. فأجدنى قد أفشيت اسرارا لا أملكها وحدى .. و اسقط فى دائره أقرب لليأس .. و أتجمد مكانى لا أستطيع التقدم ولا التراجع
أخطأت فى حق أصدقائى كلهم .. و أقدم اعتذارى القلبى للجميع .. و أطمع فى كرمهم لقبول عذرى .. مع تجديد وعدى بتكرارا المحاوله دون سأم لأخرج بالجزء التانى من اعترافاتى .. قريبا بأمر الله
ديالا العزيزه
مكشلة الرؤيه المستقبليه مشكله حاده .. فمن يرى هم من يدرك و يتمتع بشىء من أعمال الفكر .. و هم أقليه فى هذا المجتمع تضم كلا النقيضين .. الطغاه .. و نحن .. أما أغلبة المجتمع فقد حرمها الله ( و لعله أنعم عليهم ) من ميزة أعمال العقل .. فهم ببساطه لا يملكون أى رؤيه .. و مع أن الغالبيه هنا تكون من الضحايا .. ألا أن وضعهم فعلا يحرق الدم
من شطر كلامك أثبت كلامى .. فأمريكا و أسرائيل تخططان لعشرات السنين مستقبلا .. بينما نحن منكفئين على مشكلة قوت يومنا .. ولا نرى حتى حالنا فى أقرب غد
شكرا
رفيقة القلب و العقل عشتار
صدقت
شوفيلنا حته نعيط فيها بقى
السيده أميره الفاضله
فعلا .. قطيع من العميان أو المستعميين ( يتصنعون العمى ) سائرون جميعا فى اتجاه هوه سحيقه .. و لا يفكر أيهم فى مستقبله لا القريب و لا البعيد
حاضر يا سيدتى .. سأهدأ .. و أن شاء الله لن أصمت
شكرا لنصيحتك
العزيز ليوناردو
توقعاتك قريبه جدا من الواقع .. حتى بداية الحرب العالميه الثالثه .. فعلا قد تكون من عندنا
سمعت عن ال BRICs ?
عموما يمكن قريب اكتب عنها .. ظاهره جديده فى الأقتصاد السياسى .. هاتغير كتير .. عموما توقعاتك فعلا قريبه .. جدا
حاضر يا سيدى .. أن شاء الله اخلص الجزء التانى من الأعترافات قريب
و شكرا لمتابعتك
مجهول العزيز .. استاذى الفاضل
شكرا لتواصلك و حرصك و اهتمامك .. و فعلا لو لم نكتب .. فالظلام حالك لا محاله .. و فعلا .. قد نتغير قى يوم من الأيام .. و الله أعلم
أزورك قريبا بأمر الله .. و أشكرك لدعوتك الكريمه
العزيز عصام
واضح انك مفقوع زى حالاتى .. و لعلمك بقى .. لأن عندى عيال نفسى اقدر اغير الوضع قبل مايكبروا .. عشان مابلعنوش جيلى كله لو سكتنا على اللى بيحصل
تحياتى
ديالا العزيزه
شكرا جدا لسؤالك و امنيتك الطيبه .. طمنينى على الأهل و تحياتى
السيد الغير معلوم
صدقت .. و على فكره هم مش مطنشين سيناريو المياه لأنهم مشغولين بينا .. أطلاقا .. تمرير سيناريو المياه جزء من مهمة النظام الفاسد الفاشل
شكرا لزيارتك
الفاضله جهينه
المسرح مش أمريكى .. و الأداره الفاسده مش أمريكيه ولا أسرائيليه .. للأسف .. المسرح عربى .. و الممثلين عرب .. و المخرج عربى .. الأمريكى و الأسرائيلى دول الجمهور اللى دفع تمن التذكره يتفرج .. و المخرجين بيقدمولهم اللى يرضيهم .. فعلا بلاد مستأجره
حلم الجميل
عندك حق .. بس معلش .. طولت فى الكآبه شويه المره دى .. ربنا ما يحرمنى من تشجيعك
مجهول العزيز
ايه ياعم فيلم الرعب اللى بتعملهولى ده ؟ هو انا فى بحر الظلمات ولا أيه ؟؟ حاضر .. جاى أهو .. و ركبى بتخبط فى بعضها من الخوف
شكرا لاهتمامك
عزيزى المصرى
شكلك مش طايق روحك ... بصره
الفاضله بوسى كات
متأسف لو كانت موضوعاتى سوداويه شويتين .. و الله ممكن لو دورتى جوه المدونه تلاقى حاجات ظريفه .. بتيجى معايا ساعات كده بالغلط يعنى
شرفتينى .. و مدونتك رقيقه جدا من النوع اللى ماليش فيه قوى
الحلم الجميل مره أخرى
هنا و فى الخدمه .. شكرا يا فندم
انا بحب دايما اقرأ الردود على تعليقاتى اولا اشكرك انك قلت على المدونة انها رقيقة جدا لكن زى ما يكون قلت لى حلوة واطران -سورى يعنى- وملكش فيها , طبعا مفيش حد مجبر انه يقرأ حاجة مش بيحبها او مش عاجباه .. عموما هى مجرد تعبير عن مشاعر مكبوتة .. ثانيا اشكرك جدا
بوسى كات الرقيقه جدا زى مدونتها .. أولا أحترم اهتمامك جدا بالمتابعه .. ثانيا .. ماحصلش أنى قلت مدونتك مش عاجبانى .. بالعكس .. رائعه .. و عن نفسى أعترف بأنى عاجز عن تناول مواضيع رومانسيه بمثل الرقه و الحساسيه اللى بتكتبى بيها ... يعنى ببساطه باحسدك على قدرتك على التعبير الرومانسى لأنى فاشل فى هذا المجال .. و ده كان قصدى
الحقيقه أنا شكرت ياسر جدا لأنه كان سبب تعارفنا .. أخيرا ياسر بقى له فايده فى حاجه .. شرفتينى
Brics ?
لأ, ماسمعتش عنها قبل ماأنت تقولى بس لقيت موضوع صغير هنا وكان فيه شوية معلومات ظريفه بس ماقدرتش أستوعب كل حاجه ..
طبعا مش هاقولك مستنى مقالك عنها بفارغ الصبر غير لما ربنا يعينك وتقدر تخلّص الجزء الثانى أولا
ربنا معاك :)
Post a Comment
<< Home