قطعان .. و قطعان
رغم أن موضوعى الأخير كان دمه تقيل قوى قوى على قلب كل الناس .. و لم أتلق أى تعليقات تذكر عليه .. و رغم أنى كنت قررت أرجع لشوية هيافه و اكتب عن مغامراتى فى تعلم الطبخ بعد هجرة كاترين .. لكن .. مش قادر .. مش قاااادر .. دمى تقيل خلقة ربنا .. أعمل أيه ؟؟
ببساطه و أنا اشاهد التليفزيون ليلة أمس بعد عناء يوم مقرف فى العمل .. و معاناه من معاناة الناس و سلبيتهم .. أولا وافق أمس ذكرى أول اضطرابات عماليه فى الولايات المتحده الأمريكيه . كان هناك فيلم تسجيلى عن مظاهرات العمال .. و اشباكات مع البوليس .. و قنابل مسيله للدموع .. و ضرب بجد .. من الناحيتين .. يعنى مش أول ما البوليس يظهر كله يجرى .. لأ .. رجاله بجد بيواجهوا .. و ينضربوا .. و يضربوا .. و بشكل جماعى .. آلاف مؤلفه بتتحرك .. وأضراب فى قطاع صناعة المنسوجات كلها .. طبعا أنتهى النضال الرجالى للجموع برضوخ الحكومه لمطالبهم .. و كانت بداية تأسيس الحركات العماليه فى الولايات المتحده الأمريكيه .. تعرفوا أمتى حصل ده ؟؟ سنة 1934 .. يعنى أيام ماكنا كلنا لسه بنلعب فى مناخيرنا و نكتب منشورات و كلام فارغ .. كان فيه شعوب بتتحرك بشكل جماعى و تكافح عشان حريتها ..
الخبر التانى كان من المجر .. الجماهير هاجمت التليفزيون .. و حرقت جزء من مبنى رئاسة الوزراء .. بسبب أن رئيس الوزراء كدب فى تصريح للشعب .. تخيلوا .. شعب عنده كرامه .. ثار و كسر الدنيا عشان رئيس الوزرا كدب فى بيان
سبحان الله .. فى الحالتين .. الأمريكان سنة 1934 .. و المجريين الآن .. السلوك جماعى .. سلوك قطيع فعلا .. نفس فكرة سلوك القطيع المصرى .. لكن طبعا هناك فارق شاسع بين قطيع من النمور .. و قطيع من الخرفان .. طبعا عارفين مين هم النمور .. و مين لا مؤاخذه الخرفان ...
..
posted by lastknight | 12:13 AM
10 Comments:
انت لسة فاكر اننا قطيع خرفان؟؟
يا ابنى احنا وللة الحمد بننضرب على قفانا كل يوم ستين مرة فى الدقيقة
وكل ما يتنفض واحد ويقول لااااء انا مانضربش على قفايا
يتشد على اوسعها جحر ويتردم عليه
----
المجر علشان الراجل يا عينى حب يجرب الكدب شوية حرقوا البلد على راسه
اومال احنا بقا نهبب اية؟ اللى كل يوم قاتلين مننا مالا يقل عن 100 روح كل يوم
ولا فى فضيحة بتاع بنى مزار والكدبة والحدوتة الكبيرة اللى نصبوها عالواد يا عينى
-------
ولا اية ولا اية ولا اية
والنبى تسكت يا فارس
انت قلبت المواجع
لو سمحت إحنا مش خرفان أهي الخرفان ليها فايده علي الأقل
شوف يا أخ فارس يا حبيبي
إنت بعد ما أعلنت في القعدة الخاصة بتاعت إمبارح عن برجوازيتك المتسلقة ومعاداتك للبروليتاريا الكادحة اللي طالع دين أمها فدعني أعلنها لك صريحة مدوية
يا صديقي الرأسمالي المتعفن
ارجع إلى صفوف الرفاق أحسن لك بدل ما نهايتك تبقى في مزبلة التاريخ
أما حكاية قطيع الخرفان فحتى دي مش دقيقة يا عم الحاج
نخن لسنا قطيعا من الخرفان
بل كما قالت عشتار لا فض فوها
نحن قطيع من النعاج
وبعدين مجر إيه دي اللي بتقارننا بيها؟
وأمريكا إيه أيها الزنديق؟
دول كفرة زنادقة
مصيرهم جهنم وبئس المصير
دول يا ابني مفسدين في الأرض ويجب أن يقام عليهم الحد
يبدو أنك صبئت يا عم الفارس الأخير
وصرت من المهرطقين
وبعدين إيه حكاية إن البوست اللي فات محدش عبرك فيه؟
أما إنك زي القطط تاكل وتنكر!!!
عشتار علقت
وشهروزة علقت
وعمر علق على ما أذكر
وكذا حد علق
استنى عليه شوية كمان على ما يستوي يمكن التعليقات تزيد
أو اعمل له شوية دعاية في المدونات التانية
وأنا كمان علقت تعليقا تحليليا
وقلت لك سادية ومازوخية وباصيت لك الكورة عشان تتكلم في موضوع الاستفعال السياسي وندوس بقى وانت اللي شوطت الكورة بعيد
لا يا عم يا إما تبطل البورجوازية بتاعتك دي أو سأسخن عليك الشباب اليساري والناصري
ودول يا ابا ما يعرفوش أبوهم
دول سلفيين أكتر م الوهابيين وها يطلعوا دينك
مساء الخيييييييير
(قعدة امبارح كانت رائعة. شكرا)
شهرزوده الجميله
مره من نفسى أقلب المواجع يا شهرزاد .. ما انتى فالقانى على مدونتك بنكد مزمن .. أشمعنى أنا بقى ؟
____________________________
ألى عمر حبيبى
تصدق صح ..
____________________________
الى العزيز محمد
يشرفنى تعليقك دوما .. و اشكرك للأطراء الذى أرانى لا أستحقه لما جمال الخايب بتاع البولنج يقول طاقه نوويه .. على طول ترد تقوله .. خالتك اسمها نوويه
_______________________
الحاج جحرجس
بتسيحلى ؟؟ طيب .. أنا برجوازى يا سيدى .. أى خدمه ؟ و بعدين رفاق أيه ؟؟ أنت عبيط يا كابتن ؟ هو لسه فيه رفاق فى الدنيا ؟ ماخلاص .. النظريه و التطبيق أثبتوا افلاسهم .. و فتونة تحويل رأسمالية الفرد ألى رأسمالية دوله ثبت عدم أخلاقيتها ولا جدواها فى أى ظروف ..
مسألة الخرفان و النعاج دى ... مش هاختلف معاكم
مسألة بقى أنى كافر و زنديق و كده .. بص .. رمضان جاى أنشاء الله .. ممكن اتوب ..
و على فكره أنا أهوى مجادلة الناصريين و اليساريين .. المهم احترام منهج الفكر .. و طبعا من هواياتى اللعب بدماغات الوهابيين .. أما يا جرجس يا أخويا بيكرهونى كره .. عموما هم محللين دمى من زمان .. بس الجديد بقى أنهم لو عكشونى هاقولهم جرجس هو اللى قالى .. عشان كان بيعمل تبشير و عاوزنى أتنصر .. أنا بي احب اهدى النفوس ... هاهاهاه
حلوة قوي حكاية التبشير دي يا عم الفارس الأخير
أهي دي تبقى الخبطة اللي في الجون وساعتها هتتحالف قوى الشعب العامل من مثقفين ووهابيين وأمن دولة وعلى قفا العبد لله واديها
أما إن قلبك اسود أوي
رمضان كريم يا عم الفارس
وبرضه هاقول لك يا رفيق
طيب عايزنى اقول ايه بعد ماظهر الحق وطلعت برجوازى زى ما قالوا
:)
وبعدين بصراحة انا مختلفة معاك ومن غير زعل
انا باحس انك قاعد والبايب فى ايدك واللاب توب قدامك وكاترين بتعمل القهوة التركى لحضرتك فى المطبخ وانت بقى عمال تسخن فى الواحد يكره عيشته والعيشة واللى عايشينها
ايوة احنا قطيع نعاج
بس احنا ما كناش بنلعب فى مناخيرنا سنة 34 وكان فيه ناس بتقاوم الاحتلال وللا انت شايف انه ما كانش احتلال؟؟
بجد حرام تشطب تاريخ باستيكة لمجرد التدليل على وجود ناس تانية بتعمل يمكن حاجة احسن، دة ظلم فى وجهة نظرى
بجد يا صديقى انا باحترم ارائك جدا ومعاك فى سخطك جدا جدا وعارفة اننا عايشين فى وقت صعب يمكن اصعب وقت عدى على البلد دى عارف ليه
لأن مافيش عدو محدد بتواجهه غير نفسك وأهل جلدتك، الناس فى المجر عملت كدة علشان عندهم الحد الأدنى اللى يخليهم يثوروا لكن هنا الكرابيج الحياتية مخلية الناس همدااااانة، مش فاكر ثورة الجياع أيام السادات، الناس كان لسه فيها حيل تثور وتطالب بحقها، لكن دلوقتى مافيش
دلوقتى يا عزيزى وباشراف الجمعيات الاهية والبنوك مجهولة الهوية عاملين بنك الطعام
سمعت عنه وشفت اعلاناته
احنا بقينا شعب جعان يا باشا، وبيشحتوا علينا فى الفضائيات
عايز ناس زى دى تثور لما شوية بشر يتحرقوا فى مسرح؟؟ طب ما يولعوا بجاز هو احنا لاقيين اللقمة لما نتفرج على مسارح يستاهلوا الحرق صحيح
صدقنى دة تفكير الناس اللى ممكن تبقى نمور فى وجهة نظرك، ودة تفكيرهم نفسه لحظة ما قدم وزير الثقافة استقالته واترفضت، هو فارق معاهم فى ايه يعنى
اللى يعنيهم يا سيدى الفاضل وزير اللحمة ووزير الدوا ووزير التعيينات
ودمتم
اوعى تزعل
الحلم الجميل
أولا : هى بورجوازى دى بقت شتيمه ؟ و عموما أنا من سنتين افلست و كاترين طفشت و مامعاييش أجيب الدخان المستورد اللى بحبه للبايب .. فبقيت باشرب معسل على القهوه اللى على الناصيه
ثانيا .. أنا مش متجاهل صراع الطبقه المثقفه و الواعيه من الشريحه المسيسه فى مصر .. لكن حتى سنه 34 كان أغلبية الشعب يذبيغنى محلاها عيشة الفلاح و هو متغطى بالخيمه الزرقا .. أى ملتحف السماء يعنى ماعندوش يجيب غطا .. اللى أصب جام غضبى عليه هو الشريحه الأعظم من الشعب .. العبيد بالسليقه .. و لا أرى أمل فى تغييرهم .. حتى الآن
مسألة أنهم بيشحتوا علينا .. نستاهل , أحنا اللى مابنثورش على أرزاقنا بعد ماسكتنا على كرامتنا . مسألة انتفاضة الجياع أيام السادات رحمة الله عليه بتشككنى أكتر فى أهدافها .. و أكاد أميل لرأى الراحل أنها كانت انتفاضة حراميه مش انتفاضه شعبيه .. لو الشعب ده يقدر ينتفض بجد من غير دسائس كان انتفض من زمان عشان العباره ولا القطر ولا الغلا فى البنزين و لا رفع الدعم عن الدوا .. الحكايه لو نظرنالها بعين فاحصه .. أعتقد نشك فى أنها كانت انتفاضه شعبيه من أساسه
كارثتنا هى أغلبية الشعب ,, اللى لو اصر على حقه الطبيعى ايام الأنتخابات بي ( مش هاقول ثوره شعبيه ولا عصيان مدنى لأنه مستحيل أن يتحرك العبيد خارج النظام ) لو تحرك ه>ا الشعب فعلا و داخل النظام .. لأمكنه التغيير .. لكنه شعب يشترى عبيد ليدربهم ليصيروا حكامه .. كارثه حقيقيه
طيب ممكن اديلك الموبايل بتاع الست اللى بتساعدنى فى شغل البيت ودى مساعدة من الاغلبية المطحونة لبرجوازى سابق
صديقى العزيز
انا ماليش فى الجدل وقلت وجهة نظرى المتواضعة بناء على افكارى المتواضعة برضه واتمنى انها لا تفسد الود بيننا
مش مشكلة لما كل حد يشوف الدنيا من نضارته الخاصة،ودة شىء صحى
اعتز بصداقتك جدا واوعى تزعل
الحلم الجميل
المستحيل الخامس فى هذه الدنيا أن أزعل منك ... و رأيك سواء اتفق مع أو خالفنى يشرفن و يسعدنى ..
الحمد لله بتجيلى أم محمد تنضف كل أسبوع .. و الأكل بق .. أهى بترزق .. مره أختى .. يوم والدتى .. غالبا فى الشارع ..
أشكرك بعمق لردك و لأهتمامك .. و أدعيل اقدر استرد وضعى المالى تانى عشان أجيب أتنين كاترين مش كاترين واحده
يافارس
انا غريبه ومختلفه وحاقولك كلام بايخ قوي مختلف تماما عن كل اللي بيعقبوا علي كلامك
بصراحه بصراحه .... انت اكثر فنا وموهبه وابداع وجنون عن انك تستغرق طاقاتك في الكتابه عن وفي السياسه ذلك المستنقع الموحل ... مافيناش من الضرب ... وبس خلاص
--------
لااحب دونكيشوت خالص
رغم انه كان فارس !!!!!!ا
برضه مافيناش من الضرب ربنا يخليك
Post a Comment
<< Home