فارس قديم

احلام و أوهام و أمنيات .. أليست كل المبادىء كذلك ..؟ حتى أخلاقيات الفرسان

Name:
Location: cairo, Egypt

قد أكون أكبر المدونين سنا ..ما أكتبه هنا بدأته منذ سنوات فى دفاترى .. كتبت لنفسى .. و لأولادى حين يستطيعوا استيعاب ماكتبت .. رأيت أن لامانع من نشر بعض مافى الدفاتر .. فى حريه تااااامه

Friday, August 11, 2006

الولد أكرم بقى بطل

أكرم .. أبنى الحبيب .. فاز بالمركز الثالث فى بطولة الجمهوريه للتايكوندو .. الحمد لله .. أكرم سيتم سن الثانية عشر فى أكتوبر القادم .. شقى و دمه خفيف جدا .. بحيث أنى ما قدرش آخد منه لا حق ولا باطل .. كل مايعمل عمله و آجى أعاقبه .. يضحكنى .. لكنه الحقيقه مؤدب .. و أخلاقه مقارنة بكثير من جيله بسم الله ماشاء الله ممتازه
لكن طبعا اللعب واكل دماغه تماما .. طبيعى .. فى سنه لازم كده
لم أستطع حضور البطوله معه .. فأمه تصحبه لهذه المناسبات .. و تقديرا للموقف الأجتماعى و لعدم وضع الولد فى موقف قد يشتت تركيزه فضلت يومها الخروج مع نور بنتى .. و الأتصال به كل ساعه لمعرفة أخبار نتائجه ..
الحمد لله .. المركز الثالث شىء جيد .. و هو الأول على ناديه فى وزنه .. و عموما أراه يمتلك موهبه فى هذه اللعبه .. فهو شجاع .. سريع البديهه ماشاء الله .. بعض التدريبات الخاصه .. و بأمر الله سيكون من الأبطال .. بالمناسبه من 24 سنه أنا كنت بطل الجمهوريه فى نفس اللعبه و من نفس النادى .. و أغلب مدربينه حاليا سبق لى أن دربتهم .. و أكرم بدأ ممارسة اللعبه بناء على ذلك و فعلا وجد فيها هوايته .. لو أتمكن من تدبير بعض الوقت له بأمر الله .. سأشرف بنفسى على تدريباته الخاصه
المهم .. الولد الحمد لله بقى بطل .. و أنا فخور بيه جدا .. و فكرت أشرك مجتمعى الرائع من المدونين فى فرحتى

16 Comments:

Blogger Gid-Do - جدو said...

صاحبى

الف مبروك لاكرم وان شاء الله يتحقق الحلم ويبقى بطل الجمهورية وطبعا ابن الوز عوام اما الفسحة من نور فهى بالدنيا وما فيها ربنا يسعدهم وتشوفهم احسن ولد وبنت فى الدنيا تحياتى

8:06 AM  
Blogger Epitaph said...

مبروووووووووووك يا اكرم
ويا ابو اكرم
و يا رب تفرح بيه دايما كدة

بس الواحد يحترس بقي
ماشاء الله عليه بطل تايكوندو

لا لا انا معايا حراسة برده
اختي الصغيرة بتتدرب كاراتيه
احم احم بس لسة في اول الطريق

شربات هنا بسرعة للباشا

1:07 PM  
Blogger أحمد said...

الف مبروك

3:09 PM  
Blogger bluestone said...

الف مبروك يا ابو اكرم .. خبر مفرح بجد في الايام الغامقة دي .. ربنا يحافظ لك عليهم

6:13 PM  
Blogger sha3'af said...

الله يبارك لك فيه

أنا بس جيت هنا أقول ان تعليقك عند بعدك على بالي كان في الصميم


بالمناسبة

كنت قريت البوست اللي فات
و شكرا ع الدعوة

بس ماكنتش عارفه أرد بايه

أنا هأستسمحك اني هأبقى أرد عليه لكن بعدين

دلوقتي ما ينفعش

شكرا مرة تانية

12:26 AM  
Blogger حــلم said...

مبروووك لاكرم
والله فرحت جدا لخبر حلو كدة

نفسى العفريت الصغير بتاعى ابو خمس سنين يكون زى اكرم كدة

نفسى اخليه لاعب رمى جلة
:)

مبروك ليك وربنا يخليك لهم

3:09 AM  
Blogger Maat said...

Mabroook :))

3:42 AM  
Blogger lastknight said...

الى جدو الحبيب ..
ألله يبارك فيك و مايحرمنيش من مشاركتك ليا فى الفرح .. و عقبال ماتفرح بياسمسن و اخواتها
_____________________________
ألى صديقتى العزيزه العفريته الصغننه
الله يبارك فيكى يا ست الكل .. و الشربات عندى أنا ياستى المره دى .. عقبال ما نشرب شربات فى فرحك أنشاء الله
__________________________________
ألى أحمد
ألله يبارك فيك
__________________________________
ألى العزيزه المتعبه القهوه العاليه
ألله يبارك فيكى .. و عقبال كده مانفرح لما ناخد فيزا لجزيرة مدغشقر ..
___________________________________
ألى شغف
ألله يبارك فيكى .. و أنا بانتظار تعليقك على مدونتى.. و ايضا على تعليقى عند بعدك على بالى ..
و خدى وقتك و ربنا معاكى
___________________________________
ألى للرقيقه حلم
الله يبارك فيكى .. و يخليلك العفريت الصغنن .. بس اشمعنى رمى جله يعنى ؟؟
_______________________________
ألى مات
الله يبارك فيكى و شكرا على المجامله الرقيقه

4:40 AM  
Blogger بعدك على بالى said...

الف مبرررررررررررروك
واكيد انت فرحان له اكتر يمكن ما كنت فرحان لنفسك .. صح.؟

ربنا يكرمه ويفضل يلعب رياضة كده علطول ..

عاوزين الحلاوة ولا حتاكلها علينا؟

6:30 PM  
Blogger lastknight said...

ألى جميلة ألأنسانيه ..
ألله يبارك فيكى .. بالنسبه للحلاوه .. رتبى مع كل الأصدقاء موعد مقابله .. و الشربات يحضر قبلكم لو تأمروا

12:55 AM  
Blogger عشتار said...

دائما اعتقدت انك اب وصديق رائع لاكرم ونور....وذاك اشبل من ذاك الاسد....هنيئا

7:38 AM  
Blogger lastknight said...

الله يبارك فيكى و قريبا أنشاء الله نجيب شربات و نعمل ليله فى الأمبراطوريه .. و الدعوه عامه .. طبعا أكرم هايجيب اصحابه و هاتبقى ليله مش فايته ..

2:24 PM  
Anonymous Anonymous said...

ألف مبروك يا أكرم و يا رب دايما نفرح بيك
نور

5:32 PM  
Blogger tota said...

الفارس
يا سيدى الف مبروك لاكرم
من شابه اباه فما ظلم
سعيدة بسعادتك وفخرك بابنك احساس جميل جدا
تحياتى

11:04 AM  
Blogger lastknight said...

ألى توتا
ألله يبارك فيكى

1:42 AM  
Blogger Abdelhalim said...

Alf mabroook, what's the name of your son's club?

3:36 PM  

Post a Comment

Links to this post:

Create a Link

<< Home