فارس قديم

احلام و أوهام و أمنيات .. أليست كل المبادىء كذلك ..؟ حتى أخلاقيات الفرسان

Name:
Location: cairo, Egypt

قد أكون أكبر المدونين سنا ..ما أكتبه هنا بدأته منذ سنوات فى دفاترى .. كتبت لنفسى .. و لأولادى حين يستطيعوا استيعاب ماكتبت .. رأيت أن لامانع من نشر بعض مافى الدفاتر .. فى حريه تااااامه

Thursday, August 03, 2006

الهروب الكبير ............. او الصغير .. او .. بصوا .. هو نص نص يعنى ..

لم أستطع الكتابه منذ فتره .. ببساطه .. أكتئاب .. أحباط .. ماليش نفس .. أو ماعنديش طاقه .. أو زهقت بقى
المهم و أنا أطالع مدونة القهوه العاليه اليوم وجدتها تصف حالتها الحاليه بحالة الهيافه المؤقته .. المسأله عجبتنى جدا .. فعلا .. لما يبقى الجد كله كئيب .. ليه الواحد مايهربش شويه ألى الهيافه و المواضيع العبيطه ؟؟ نوع من رد الفعل التلقائى للعقل .. كحمايه له من أنه يضرب خالص .. و الله فكره .. نهيف شويه .. و فيما يلى كتابات مبعثره غالبا هايفه .. من باب الهروب .. و ربنا يسهل بقى
ملحوظه : السرد ليس تاريخيا ولا مرتب حسب أى منطق
كارثة لبنان ؟ عادى .. طيب ماهو فيه كارثه أجدع منها فى فلسطين .. و كارثه أجدع منهم كلهم فى
العراق .. عادى يعنى .. ايه المشكله بقى ؟ أولادنا بيدبحوا ؟؟ طيب و ماله .. ما أهاليهم مش بيدافعوا عنهم .. ليه مش بيدافعوا ؟؟ أيه السؤال الغلس ده ؟ عموما بسيطه .. الأسباب واضحه خالص و فيما يلى بعضها .. كمثال و ليس كحصر
:
أولا : لا يوجد حاكم عربى واحد منتخب .. و بالتالى لا يوجد حاكم عربى واحد يعبر عن أرادة
شعبه,كما لا يوجد دستور عربى واحد ( باستثناء موريتانيا ) يسمح بالتداول السلمى للسلطه بطريقه
طبيعيه, و عليه .. فالحكام العرب ينتمون لبلاد غير التى ينتمى لها و يعيش فيها شعوبهم
ثانيا :جميع الثورات و الأنقلابات و الحركات اياها .. وضعت بوضوح فى أهدافها ( بناء جيش وطنى
قوى ) مش فاكرين لما درسولنا أهداف ثورة يوليو زمان ؟ و مطالب عرابى ؟ وحتى مطالب تحيه كاريوكا فى اضراب الفنانين .. كلهم طالبوا ببناء جيش وطنى قوى .. و شالوا الحكام .. و غيروا نظم الحكم .. و أمموا الناس .. و طردوا المستثمرين الأجانب و دمروا الصناعه الوطنيه بالقطاع العام .. و نسفوا الرأسماليه الوطنيه بمبادىء الأشتراكيه (وهى المبادىء التى أفلست مؤخرا و تسببت فى سقوط العالم الشرقى كله وتركت أمريكا كقطب واحد ) المهم ..أى واحد فى البهوات الثوار العرب من ناصر ألى صدام ( الأتنين أحتلوا أراضى عربيه أولا و انتهى بهم الأمر بتسليم اراضيهم ألى اسرائيل و أمريكا ) مرورا بالقذافى و الأسد و أبنه أبن الل....المهم خلينى مؤدب .. جميعهم أفادوا علنا و علانيه بأن هدفهم أنشاء جيش وطنى قوى ..
حد يقولى بقى فين أم الجيش الوطنى القوى ده فى أى نيله دوله عربيه وجدت ؟ حد يعرف ؟
رابعا ..ولا بايناها ثالثا .. مش هاتفرق : العرب بطبعهم متدينون .. و مشورة الشيخ للمسلم و القس للمسيحى هى نوع من الحتميه عند الشدائد و الحيره.. فالقياده الدينيه العربيه عموما هى ضمير العرب و خلفيتهم الثقافيه الأعمق .. حلو قوى .. انا بقى كمسلم .. استشير مين ؟ شيخ وهابى بيقول أن حزب الله كفره و نسيبهم لأسرائيل تموتهم احسن ؟ ولا شيخ أزهر عاوز تلاته معاه يمسحوا ريالته بعد مايتكلم ؟ طيب لو اتنصرت ( يعنى بقيت نصرانى ) .. أسمع كلام البابا شنوده اللى الأرثوذوكس بيقولوا عليه أنه بوظ حياتهم ؟ و لا كلام ماكسيموس اللى وقع علينا بالباراشوت من أمريكا ؟
الناس كفرت .. و الخطاب الدينى كله أصبح منفر ألى اقصى درجه ..و مغيب و مغرق فى الجهاله و الحسابات السياسيه المتنازله من أساسها
.
لو حد يعرف معبد بوذى فى مصر يقولى .. أروح اسأل هناك ...مين عارف مش يمكن
النمره اللى بعد اللى فاتت ( مش هاقعد أعد بقى ): الحاله الأقتصاديه هباااااب .. فعلا .. عجز السيوله غير طبيعى .. ارقام بمليارات لا أستطيع استيعابها أنا الأقتصادى المتخصص ..دين عام يتجاوز الستمائة مليار .دين حكومى ثلاثمائة مليار ..سياحه تنخفض بنسبة 7% رغم خروج لبنان و أسرائيل من المنافسه هذا العام .. و الله العظيم فى الموسكى وجدت محل يبيع قمصان رجالى القميص ب 15 جنيه .. و صاحب المحل ماسك ميكروفون بيدلل على بضاعته ..و الله العظيم لا أحد معه هذا المبلغ ليشترى منه ..و أحد عملائى يمتلك محل ملابس فى عين شمس ..اقسم لى أنه حضر لمحله مدرس شاب محترم يصطحب طفلين معه .. أشترى لهم كسوة الصيف بأجمالى مبلغ 160 جنيه ..يقسم صديقى / عميلى أن المدرس المحترم سدد 100 جنيه نقدا و طلب منه قبول كمبيالات على شهرين لسداد ال60 جنيه الباقيه .. على الجانب الآخر من الكره الأرضيه و تحديدا فى سيتى ستارز .. محل يعرض جيبه حريمى بمبلغ 1200 جنيه .. و الشراء بالحجز .. يعنى الهانم تسيب 1200 جنيه و تيجى بعد اسبوع تستلم.. و المحل مش ملاحق على الطلبيات
يانهار اسود .. هو فيه ايه ؟
أسأل الآن عقلى الباطن .. صديقى الحكيم و أتحاور معه .. و يحاورنى
ماهو الحل ؟
بسيطه خالص .. المسأله مش عاوزه فتاكه يعنى .. أولا ممكن تشترى فيلم كونغ فو وترجع تتفرج عليه و تشوف ازاى السجيع بيضرب كل الشريرين و تتعلم منه .. و تروح تعمل زيه تانى يوم و تموت كل الوحشين ..
أنت بتستعبط يا عقلى ؟ أنا وزنى حاليا 95 كيلو .. يعنى لو نطيت من على سلمتين ممكن رجلى تنكسر عموما مش مهم نشوف اللى بعده
طيب .. بسيطه .. شوفلك غرزه أقعد حشش فيها و ودع هواك و انساه و انسانى
تانى هاتستهبل ؟ ما انت عارف أن ماليش فى الحاجات دى أولا .. ثانيا أنا منحوس و ممكن أول مره أقعد على غرزه تحصل كبسه و اتمسك .. شوف غيره
أنت هاتقرفنى معاك ليه بقى ؟ طيب اقولك ... سافر .. هاجر روح بلد تانيه
تانى الأستعباط ؟ما انت عارف أن الباسبور المصرى يادوب يودينى بلطيم .. مافيش دوله هاترضى تاخدنى .. دى تأشيرة بولندا بقت تقفلها طابور و تستنى أسبوعين أتصرف بقى شوفلى حل .. امال عامل
عقلى ازاى ؟
بص بقى .. أنت شكلك كده لازم تسمع كلام أغنية الشيخ أمام القديمه .. فاكرها ؟ بتاعة ..
وجع الراس هانعالجه بأيه؟
قالك ندى الناس القوت
قاللك طب و الجهل يابيه؟
قاللك سيب الكلمه تفوت
طب و الكلمه تفوت ازاى ؟
قاللك لازم بالنبوت
و النبوت هانجيبه منين ؟
قالك لما نهز التوت
قالك قدر خفنا نهز ؟
قالك تشرب صبغة يوت
هاتطهر أيوب من صبره و تقوم يونس من نومته و يفلفص من بطن الحوت
ملحوظه : صبغة يوت هى النطق المصرى لصبغة اليود
حد يعرف أجزخانه كويسه تقسطلى تمن قزازة صبغة اليوت ؟

23 Comments:

Blogger Gid-Do - جدو said...

صحبى
انت الابلتين عندك لسع ومحتاج قميص لكتاف وسلملنا بقى عااترماى وعلى فكرة العب مع الواد والبت حبايبك وهما راح يربطبوا الصواميل اللى هوت خالص ـ ياصحبى هون عليك وافتكر جد المصطفى علية الصلاة السلام لما راح يطلب الابل من ابرهة اللى جاى يهدم الكعبة وقاله ابراهة كنت فاكرك جاى تطلب منى عدم هدم الكعبة فقال الرجل الفطرى للمتجبر ان للبيت رب يحمية مين يعرف يمكن فية حكمة عند رب هذا الكون لما يحدث فى الكون الان كل ما علينا نؤدى اكتر مما فى وسعنا ونترك الباقى لصاحب الكون وندعوة ان يصلح احوالنا ولك كل الحب وخلى بالك من نفسك اولادك فى حاجة لصحتك اكتر ماانت فى حاجة لصحتك

7:53 AM  
Blogger lastknight said...

جدو الحبيب
و الله أنا أعترف فعلا أنى لسعت خالص .. لكن أنشاء الله الجمعه الجايه أشوف الولاد لعل و عسى .. بس أعمل أيه يا جدو .. الحاله هنا هى الكآبه بعينها . مبارك جمد مصر من 25 سنه .. مش قادر أحس بأى أمل فى أى حاجه .. لكن يالله .. (قل يا عبادى الذين أسرفوا على أنفسهم لا تقنطوا من رحمة الله )ربنا يتولانا برحمته بقى

9:50 AM  
Blogger ekraammalik said...

بسم الله الرحمن الرحيم
"وإذا أردنا أن نهلك قريةً أمرنا مترفيها ففسقوا فيها فحق عليها القول فدمرناها تدميرا" صدق الله العظيم

نحتاج التدمير لما إلنا عليه ولانستطيع الا أن نقول حسبي الله ونعم الوكيل خير المولى وخير النصير....

11:09 AM  
Blogger Epitaph said...

اقتراح ليس الا
لو فيه جو كابة
طيب ما تحاول تعد ابسط الحاجات اللي بتسعدك
اكتبهم..بدءا من الولاد..الي الكتابة الي اكلة بنحبها
حتلاقي نقط نور في حياتك
تخرجك من اي حالة اكتئاب ان شاء الله

2:21 PM  
Blogger karakib said...

تدوينه تحفه ... و بصراحه مش عارف اعلق علي ايه و لا ايه
بس السخريه الشديده دي ما تطلعش الا من واحد شارب المر من كيعانه و من سنانه و من ودانه و من كل حته نانه نانه
لا تقلق يا عزيزي ما ضاقت الا ما فرجت
صعب اوي الوضع يستمر بالشكل ده كتير ...
لكل ليل اخر
و الحزن عشش فينا مش عايز يتاخر
عايشين بنشوف كل يوم زياده مساخر
بس انا محترم برضه مش هاكون فاخر
مشيها فاخر ...
انتوك

2:53 PM  
Blogger saso said...

انا كنت كدة طول الاسبوع اللي فات ولا عارفة اكتب ولا نفس اقرا ولا حتي افتح موضوع مناقشة انشاللة تكون عن الكارتون ،بس معرفتش اقول مش فارقة لانها غصب عني فارقة
ما علينا هتصحي يوم تلقي نفسك مسكون بنفس الهموم اعتبرها اجازة حد لاقي اجازة من عقلة الزنّان

3:06 PM  
Blogger بعدك على بالى said...

اما الهيافة تبقى اللى انت كاتبه ده، امال الجد يبقى ايه.... ؟؟ فعلا تواضع فرسان العصور الوسطى..

تشرفت بزيارتك لى وسعدت بزيارة مدونتك الرائعة جدا..شديدة الصدق و "الحرارة"
خالص تحياتى

3:15 PM  
Blogger bluestone said...

يا أستاذ حراااااام عليك

هي دي برضه الهيافة ؟؟؟
هو ده اللي قلت عليه؟؟ :)

انا لما كتبت التدوينة الاخيرة قلت انها نوبة احباط وسط نوبة الهيافة

انما اللي انت كاتبه مش هيافة خالص

انت كده هتبوظ علينا الهيافة .. لا ربنا يكرمك ويديمها نعمة

عايز هيافة بجد اقولك ورزقي على الله ..

عايز تتكلم عن لبنان ماشي المسموحات اللبنانية لا تتجاوز هايفة ونانسي عجرم واحدث صرعات الله يرحمها الشحرورة صباح التي حققت معجزة (الزومبي)

عايز تتكلم عن مصر والوطنية والكلام ده.. مسموحاتك لا تتعدى نجوم إف إم .. يبقى انت اكيد في مصر .. الدوري وبطولة افريكيا .. واحدث افلام نجم الوطن العربي كله ..

تتكلم على غزة .. مممم ... فيه اوبريت وطني فزيييع اسمه الحلم العربي .. قوله 3 مرات وخلاص .. هتصحى من النوم تلاقي الوحدة العربية تمام

تتكلم في الوحدة الوطنية وامرنا لله يبقى تتكلم عن (أشكائنا في الوطن) زي المزيعة بتاعة الكناة التانية (او الكونة التانية على رأي ام نسمة الشغالة بتاعتنا) وكل عام واخوتنا المسيحيين بخير بمناسبة مش عارف ايه ...

تتكلم في السياحة .. يبقى عندك اعلان هي دي مصر يا دينا .. مفيش اجمل من كده ..

وكفاية لحد كده ..
وبعدين الهيافة يا سيدي الفاضل اسهل من كده ..
ودماغ الهيافة والنعمة ما هي مكلفة خالص .. بسيطة جدا

-اتفرج على التلفزيون المصري
-اقرا الاهرام
-تجنب نشرات الاخبار كلها وصفحات السياسة حتى في الاهرام عشان الامراض اللي بيتجيبها
-اظبط الدش على كل الروتانات وباقة القنوات الثقافية القيمة زي مزيكا وزووم وشلة الشيخ (الله يحرقه) بتاع الزيت صالح كامل
-تابع اخبار الكرة المصرية الرائدة
وانجازات الكباري

ودمتم

مش تقوللي دين عام وجيوش عربية وحالة اقتصادية .. ومش عارف ايه ..
يا رااااااجل هتزعل الهيافة مننا ..

اتعلموها بقى ...

10:30 PM  
Blogger lastknight said...

الى العراقيه أكرام
ونعم بالله ياستى

_______________
ألى صديقتى الصغننه epitaph
مع أنى لسه مش عارف معنى اسمك أيه .. لكن أولا أحييكى و أقولك برافو على تعليقك على مدونتى لقاء آخر على اليابسه .. تعرفى أنك أنتى الوحيده اللى أخدت بالها من المفاجأه و فهمتها .. ماشاء الله صغننه بس عفريته .. بقيت أقول ماشاء الله على نباهتك و شطارتك ,, و عقبال ما اشوف بنتى زيك كده و افرح بيكم أنتم الأتنين .. و بخصوص اقتراحك الصغنن الرقيق زيك .. حاضر ياستى أحاول .. افكر فى حاجات بحبها .. وتبقى فكره أنشرها و نعمم المسأله .. حاضر ياستى ________________________________

ألى أنتوك
متشكر قوى قوى على تعليقك .. و على فكره مدونتكم برضه لابسه غامق قوى بقالها كام موضوع كده .. أنبسطوا أنتوا شباب .. خلى الكآبه للعواجيز اللى زيى .. و رينا يبارك فى جيلكم و يسعد أيامكم
___________________________
ألى ساسو
أولا شرفتى المدونه .. ثانيا حاضر .. اقتراح وجيه برضه .. نمشيها أجازه لحد ماتفرج
________________________
ألى سيدتى الجميله الوقوره.. بعدك على بالى
ألى نموذج الأم فى العطاء .. و النبع السلسال الذى يروى الكل .. و يتحمل عطشه وحده بكبرياء
تنحنى هامات أمثالى تحية و احتراما لأمثالك .. و اتمنى الآن أن بيدى باقة ورد ألقيها عند قدميك و أقول بعمق .. شكرا
أنتظر مزيد من كتاباتك على مدونتك و أطمع فى مزيد من تعليقاتك على مدونتى

--------------------- ..
ألى سبب كل ده .. القهوه العاليه
يعنى قصدك أنى فاشل حتى فى الهيافه ؟ طب اعمل أيه ؟ أروح فين ؟
بس حلوه قوى معجزة الزومبى بتاعة صباح دى .. تفتكرى يا غاليه أننا ممكن ننافس اللبنانيين فى حكاية الزومبى دى ؟؟ متهيألى نقدر .. حسنى مبارك شكله كده هايعمل زيها .. و تبقى مصيبه سوده على دماغه و دماغنا
بس عموما برضه هايبقى أنجاز تاريخى لمصر زى أنجاز بتولة أفريكيا كده .. و بخصوص البطوله دى .. و بما أنك من الجيل الجديد .. ماتعرفيش المزز اللى جابوهم يشجعوا الفريق القومى ودوهم فين بعد الماتش ؟
عموما أنا هاحاول فى الهيافه تانى .. بس اعذرينى بقى لسه جديد .. و الله أول مره ..

ألى الجميع .. فرحتونى .. حبى و تقديرى لكم يا مجتمعى الرائع الصغير عددا الكبير مقاما

12:23 AM  
Blogger Epitaph said...

واضح ان اسمي ده مشكلة
ابيتافepitaph
inscription written on a tombstone
بمعني
اللي بيتكتب علي شاهد القبر
في اوربا والدول المتقدمة
بيكتبوا علي القبور
وكل الكتاب الكبار
زي شكسبير و الكساندر بوب و بن جونسون ووووو
علي قبورهم كلام
يا اما هما اللي كتبوه قبل ما يموتوا
او صديق بيكتبه ليهم

عامة..ده اسمي
ولو انها حاجة مش موجودة في العقيدة الاسلامية..الا انها كلمة حلوة..ونطقها لغويا شدني

في اول المدونة بتاعتي..اول بوست عن الاسم ده

تحياتي

1:27 AM  
Blogger bluestone said...

حاسة كده كأنك بتقوللي إلى سبب كل المصايب دي ..
ماشي ياسيدي ..

على العموم مفيش مشكلة احنا ممكن ندي لسيادتك دروس خصوصية في الهيافة او حتى مجموعات تقوية .. احنا احسن شعب متخصص في المسألة .. أما جيلنا بقى فهو من الرواد في قضية الهيافة .. لاننا متخصصين .. ولما كبرنا مالقيناش غيرها .. لكن بالرغم من الريادة العالمية لينا في الهيافة إلا اننا نأتي في المركز الثاني اقليميا بعد السادة الاخوة اشقاءنا في الوطن الاغبر السادة الاحباء ملوك الزيت اولا الخليج ..
فلهم كل الريادة في الهيافة اللي على حق .. في الهيافة المكلفة .. اما احنا فعلى قد حالنا بنحاول بس في الهيافة غير المكلفة ..

اما بالنسبة لسؤال حضرتك
/ماتعرفيش المزز اللى جابوهم يشجعوا الفريق القومى ودوهم فين بعد الماتش /
سؤال بسيط جدا ... بيرجعوهم مخازن الوزارة طبعا .. لحين موعد البطولة المضمونة اللي جاية .. اشكواش او كرة ريشة او كرة يد من بتاعة حسن مصطفى او لما المنتخب الكومي بتاعنا يكسب فريق ام دجدج في مجاهل افريكيا ..

تحياتي

2:17 AM  
Blogger lastknight said...

الى صديقتى الصغنونه epitaph
نورتينا يا ستى .. بس ليه الأسم ده ؟ شاهد قبر ..؟ بعد الشر عليكى .. ماتشوفى اسم تانى يكون معناه مبهج شويه
_____________________--
ألى اللى كانت السبب
أولا فارق كبر جدا بين هيافتنا و هيافة الخليج .. أحنا بنمثل الهياقه .. لكن هم بيتصرفوا بطبيعتهم
ماتعرفيش طيب مخازن الوزاره دى فين ؟

3:08 AM  
Anonymous Anonymous said...

علي طريقه حالد محيي الدين في كتابه والأن أتكلم إسمح لي أكلم أنا يا سيدي عمر قناوي اللي صدعت دماغ الناس بالكلام عنهوعن الإمبراطوريه مبروك يا جميل هذه المدونه الجميله اللي فاجئتني بموهبتك الغريبه علي الكتابه ببساطه وعمق في آن واحد عموما مش عايز اطول ونصيحتي الوحيده لك هي أن تستمر في الكتابه وطبعا لكي تتطور هذه الموهبه لازم تقرا أكتر يعني تشتري كتب أكتر زي ما انت فاهم طبعا خالص مودتي عمر قناوي مؤسس الإمبراطوريه التي لا تغرب عنها الشمس

9:45 AM  
Blogger bluestone said...

ماشي بس هما بيهيفوا بزيتهم ولا مؤاخذة .. قصدي بفلوسهم .. احنا بنهيف حاف .. أورديحي يعني .. آدينا عايشين وفي يوم من الايام الزيت هيخلص وهنشوف

مخازن الوزارة فين؟؟؟؟؟
لا يا عم وانا مالي دي عهدة
وتبديد أموال عامة
وانا ماليش دعوة

11:20 AM  
Blogger lastknight said...

الى عمر قناوى
مؤسس الأمبراطوريه .. و اخى الحبيب رفيق التسكع فى شوارع القاهره , شرفتنى و لو أنك جيت متأخر قوى ..ووحشتنى فعلا لأن بقالنا كتير ماقعدناش .. لكن هانت أنشاء الله ..أقرا كتير و يعنى اشترى كتي .. عمر أنت بدأت تتحول ألى رأسمالى مستغل ..
و بعدين أنا قررت أهيف .. يعنى تحط استاند فى المكتبه تملاه بقى .. الشبكه و الموعد .. و كتب عن ليلة الدخله و عذاب القبر .. و كده يعنى .. سيبك بقى من التاريخ و السياسه و الفلسفه و البتنجان ده .. خليك فريش كده
_________________________________
ألى القهوه العاليه
طيب .. ماهم لبيهيفوا بفلوسهم و احنا بنهيف مع أن مامعاناش فلوس .. يعنى برضه نقطة تفوق لنا زى بتولة أفريكيا كده ..
و بخصوص العهده و الأمانه و الكلام ده .. يعنى هى جت عليا انا ؟ ما كله بينهب من العهده .. هى الكحكه فى أيد اليتيم عجبه ؟ عليه العوض فى المزز .. معلش بقى .. أنا هاروح اربى سمك أو عصافير وخلاص .. أى حاجه تحسسنى بالحنيه ولا الحوجه للعهده

1:16 PM  
Blogger بعدك على بالى said...

كلماتك/ مساندتك مسحت الكثير من الدموع والهموم .... خالص تحياتى وامتنانى

11:44 PM  
Blogger الغـــــــــــــريب said...

بصراحه كنت داخل اكتب تعليقى
وأمشى أصل أنا فى حالى شويه
بس بصراحه التعليقات من الزملاء ومنك
نستنى
أه أفتكرت أنت حاولت تهرب للهيافه بس معرفتش تهرب من العمق والدقة فى عرض الموضوع تعبيرات اللغويه جميله وغزيره فى مدونتك أنت باين عليك من مواليد الزمن الجميل أيام الكتاب والأمسيات الثقافيه
وكتاب المدرسه بتاع القوميه العربيه
مش عارف هو موجود الكتاب ده دلوقت ولا ده كان حكر علينا
تحياتى

1:30 AM  
Blogger BaLqEeS said...

عجبتني هيافتك

اذا الهيافه زي الي انت كاتبه

فاهلا بالهيافه

3:19 AM  
Blogger lastknight said...

الى الرقيقه بعدك على بالى
باقة ورد أخرى ألقيها على قدميك فرحا بابتسامتك .. استمرى فى أنسانيتك و لا تتراجعى عن عطائك .. فيكفى أنك بكل فخر .. أنسانه
_______________________________
الى الغريب
قومية عربية مين يا استاذ ؟ انت بتهزر ؟ اسألنى عن كتاب ليلة الدخله ..الشبكه .. الموعد .. برامج روتانا .. باقولك بنهيف .. بنهيف .. و تقولى أمسيات ثقافيه و ماعرفش أيه .. ياعم بقى هاتطير دماغ الهيافه اللى كلفناها
__________________________________
ألى بلقيس .
شكرا على أطرائك .. زرت مدونتك .. الموضوع الأخير فلسفته عميقه فعلا .. و سردك واضح و بسيط .. لكن اللهجه بصراحه .. يعنى .. مش مفهومه شويه .. شرفتينى بزيارتك و تعليقك .. و أسعدنى زيارة مدونتك ..

3:56 AM  
Blogger Elsede3' said...

يا صباح الفل...
ده تعليقى على المدونات كلها:
لا تعليق، مشاعر كتير أوى حسيت بيها و تزاحمت لحد ما -أسمحلى فى التعبير- اتزنأت فمطلعش منها حاجة
حسيت ان مصر بتقع بس -و ياللعجب- لسّه بخير
حسيت من كلامك بجمال مصر اللى دايمان بشوفه و أعبر عنه
أوعدك اننى هفضل أقرأ مدونتك، بس موعدكش انى أعلقك
لأنى ببساطة بتسبّت

12:07 AM  
Blogger Elsede3' said...

يا صباح الفل
تعليقى ده على كل المدونات:
لا تعليق، كلام كتييييييييير كان عايز يطلع لدرجة ان كله حاش بعضه
حسيت ان البلد بتقع و فى نفس الوقت -و يا للعجب- لسّه فيها خير
حسيت بالجو المصرى اللى بحبه و بالمسه فى حاجات صغيرة أوى
فأعذرنى على عدم التعليق، لكن بجد، أوعدك انّى ابقى زائر دائم
و سلملى على ولادك

12:20 AM  
Blogger tota said...

الفارس
لو كل الناس فوارس مكنش بسبورنا العربى يبقى سبة فى جبينا
لو كانت حكومتنا المبجلة بتعرف تحمى ولادها ومحافظة على كرامتنا مكنش ده يبقى منظرنا
لو كنا مش خنوعيين وضعيفين وقابلين الذل ومتلذذين بيه مكنش ده يبقى حالنا
شيل ايدك من على الجرح عصرت قلبى
العبارة فى الرجولة ومن غير الرجولة لا التوت ولا صبغة اليوت هتعمل حاجة
الرجولة هى اللى عملت تشكيل الضباط الاحرار وهما اللى شالو الملك لما طغى وبغى مين بقى مخلى الريس لحد ما بقينا مكسوفين نشوف نفسنا فى مرايتنا

مش لاقية كلام تانى اقوله
اصل الرجوله مش بتتصنع ولا تتعمل دى بنتولد بيها وبتكبر معانا وبنميها لو ماتت خلاص مات كل امل فينا
تحياتى

11:22 AM  
Blogger lastknight said...

الى توتا
أعجبتنى جدا الغضبه الصعيديه .. فعلا صعيديه حره .. بجد و حق و حقيق .. عفارم على أصلك

1:33 AM  

Post a Comment

Links to this post:

Create a Link

<< Home