فارس قديم

احلام و أوهام و أمنيات .. أليست كل المبادىء كذلك ..؟ حتى أخلاقيات الفرسان

Name:
Location: cairo, Egypt

قد أكون أكبر المدونين سنا ..ما أكتبه هنا بدأته منذ سنوات فى دفاترى .. كتبت لنفسى .. و لأولادى حين يستطيعوا استيعاب ماكتبت .. رأيت أن لامانع من نشر بعض مافى الدفاتر .. فى حريه تااااامه

Friday, December 14, 2007

قطة الصحراء .. منها لله

لأنها قطة فهى بتنونو . لكن بما أنها قطة صحراء فهى ممكن كمان تعض و تخربش .. و بما أن الطيب احسن .. و لأن حكم القوى على الضعيف قاعده منطقيه مقبوله جدا .. و لأنها فى الحقيقه صاحبة كتابات عميقه فعلا يمكن من خلالها الحكم عليها بأنها بنت بلد جدعه .. و رغم أنى لا أحب مايسمى بالتاج عموما ( باعتبار أن قصة سلطانية مرزوق فى تاج الجزيره تمثل علامه فارقه فى تكوين وجدانى ) و انا قلت كلمه قبل كده .. أنا مش هاقبل تاجات من حد .. و كلمتى لايمكن تنزل الأرض أبدا .. لكن عشان خاطر قطة الصحراء ... معلش .. تنزل المره دى
و هذا هو التاج بأسئلته باللون الأحمر .. و أجاباتى البريئه باللون الأسود

لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟
.و الله على حسب جنسيتى العربيه .. يعنى .. لو كنت لبنانى مثلا .. غالبا هاسأل أيه الشعب الغبى اللى راضى يعيش من غير حريه ده ؟ هم مابيقروش كتير عشان يتعلموا ليه ؟ هم مش بيشتغلوا فى التجاره و الصناعه عشان يغيروا حياتهم ليه ؟ هم ليه كده خانعين بيدوروا على حد يستعبدهم بوظيفه و خلاص بدل مايبقوا احرار ليه ؟ و كمان ليه مشوهين بيوتهم و مش بيجملوها و بيسيبوا عماراتهم من غير تشطيب من بره ليه ؟ مش بيزرعوا ورد ليه فى المساحات الصغيره بدل مايرموا فيها الزباله ليه ؟ معقول يكون الشعب ده هو اللى بنى الهرم ؟
لو كنت سورى هاقول : لا قوة ألا بالله .. شعب بيشتكى من قلة المصارى .. مع أن الفلوس فى لغات العرب أسمها كلها مصارى .. نسبة ألى مصر .. حيث لم يكن فى العرب دوله لها عمله قابله للتداول عالميا سوى مصر .. سبحان الله
لو كنت عراقى هاقول : و الله مصر بخير .. عمار يا مصر .. لاتفجيرات و لا انتحاريين ولا حاجه .. عمار يامصر و الله
لو كنت تونسى .. هابص بشفقه للمصريين و اتصعب عليهم .. و اقول و الله خساره
لو كنت خليجى هاقول : ماشالله عليهم .. بلد حلوه صحيح .. نسوان ماشيه عريانه فى الشارع .. بنطلونات و جيبات و كاشفين شعورهم ..
الواحد ممكن يتجوز ببلاش هناك اتنين و تلاته و اربعه .. و يقيم سنة رسول الله و يدخل الجنه .. بينا على مصر
لو كنت سودانى هاسأل : هى دى مصر اللى بيقولولنا نروح نتعلم و نتعالج فيها ..؟ لا يازول .. أنا رايح ليبيا .. الأخ العقيد بيرحب بينا هناك .. و ممكن يجيبلنا تأشيره لأيطاليا
لوكنت أوروبي أو غير مسلم هتبقي إيه نظرتك للعرب والمسلمين؟
مش مسألة نظره .. مسألة رد الفعل بعد النظره الفاحصه .. رد الفعل هايكون حاجه واحده .. أتفو

لو قالوا لك إنت بقيت رئيس جمهورية هتعمل إيه؟
أولا : و بموجب قانون الطوارىء أصدر أمر اعتقال عسكرى فورى لكل أعضاء الحزب الوطنى بلا استثناء .. هم و أقاربهم حتى الدرجه التالته .. ثم
ثانيا : برضه بموجب قانون الطوارىء .. يتم التضييق الشديد على الجميع بالأعتقال و حتى التعذيب لحين الوصول لجرد كامل لأملاكهم و مقتنياتهم خارج و داخل البلاد و استردادها كامله .. مع تخيير المعتقلين بين أمرين .. أما الخضوع لمحاكمه عسكريه بتهمة الخيانه العظمى فى حالة عدم ردهم لكل مانهبوه من البلاد .. و أما .. الوقوف أمام القضاء المدنى العادل فى حالة اعترافهم بالجرم و سدادهم للمسروق .. مع التوجيه أن الأعتراف و رد الأموال سيؤخذ بعين الأعتبار و يستوجب الرحمه
ثالثا : تشكيل لجنه من خبراء الأقتصاد و المحاسبه . جميعهم من رجال الأعمال المصريين و الرأسماليين الوطنيين و ليس بينهم موظف رسمى واحد لجرد و تقييم ماحدث بالتحديد فى عمليات بيع القطاع العام .. و بموجب القانون العادل .. لو ثبت وجود أدنى شبهه للتربح أو لضياع أمول على الناس يتم فورا استرداد هذه الأوال بطريقه قانونيه تماما و بمعاملات محاسبيه طبيعيه .. لا مصادره ولا تأميم .. فقط محاسبه حقيقيه .. بغرض تقويم دور رأس المال الوطنى و أخضاعه بالكامل للقانون
رابعا : تكليف لجنه من الخبراء الدستوريين لأعداد دستور جديد للبلاد .. يتم أعداده على قاعدة مشروع دستور 1954 الذى دفنه عبد الناصر ( و الذى مازلت مصرا على أنه خائن ) على أن يتضمن الدستور فى أهم جوانبه على قصر مدة الرئاسه على فترتين فقط مع منع اقارب الرئيس حتى الدرجه الرابعه من الترشيح للرئاسه خلال فترتة تولى الرئيس , الغاء خانتى الوظيفه و الديانه من وثائق تعريف الشخصيه . فلا الديانه و لا المنصب الوظيفى يشكلان أى فارق فى تعامل المصريين .. الكل سواسيه .. الكل مواطنون .. الكل شركاء ..
خامسا : .. أتوكل على الله و اعلن انتخابات مبكره عشان اسيب منصب الرئيس للى يفهم اكتر منى فى السياسه .. و لرجع اشوف شغلى بقى
طبعا قبل كل ده .. و فى أول قرار لى كرئيس .. أحول تجنيد كل أفراد الأمن المركزى للقوات المسلحه المصريه .. فلا يعقل أن أكون رئيسا و فى مصر مليون مقاتل مسلح يأتمرون بأمر جهاز الشرطه .. مستحيل أن يستتب أمن و تلك القوه المسلحه فى يد الشرطه .. لابد من عودة تفوق الجيش عدديا و تقنيا .. منعا لأى مغامرات غبيه

لوسمح لك برؤية الرسول عليه الصلاة والسلام وإنك تقوله كلمة واحدة ؟
أسأله سؤال واحد محيرنى .. عليه الصلاة و السلام .. لماذا أرسله الله تعالى فى العرب ؟ و ليس فى الصينيين ؟ أو اليابانيين ؟ أو الألمان ؟ لماذا جعله الله سبحانه و تعالى فى قوم أضاعوا روح الرساله و شوهوا سماحة الأسلام ؟ لماذا لم يرسله الله فى قوم قادرون على صون رسالته و العمل بها و نشرها بحق ؟
لو كنا في عصر ازدهار الأندلس كنت تتخيل نفسك إزاي؟
زى ما انا .. تاجر و رجل أعمال .. بس باتصرف بحريه .. أبنى و أنا أشعر بالأمان و الأطمئنان .. اشعر بالعداله و الحق و الجمال
لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟
الحمد لله عندى أولاد من زواجى السابق .. يعنى الوضع هنا لا ينطبق على .. المهم أنى أعيش مستقر
لو طلعت القمر هتكتب عليه ايه؟
انا تايه ... الحقونييييييييييييييي
لو مررت التاج لحد و ما جاوبش هتعمل ايه؟
هاعتبره اتصرف صح
هنا ينتهى تاج قطة الصحراء .. و لا أمرره لأحد بعينه .. لكن أطلب من جميع من يقرأ أن يجيب عليه أذا تفضل

28 Comments:

Blogger smraa alnil said...

هههههههههه

بقي يوم ما تطلع للقمر هتقول انك تايه

ايه التاج العسل دة
بجد اول مرة اشوفك بترد علي تاج
شكلك مجبر زي ما قلت

واجاباتك تحفة

2:43 PM  
Blogger Desert cat said...

انا منى لله
وفى ايام مفترجة زى دى
لو جرى لى حاجه هحمل حضرتك مسؤليتى
طبعا اجابات حضرتك مبهرة
واكتر اجابة عجبتنى فعلا لو كنت رئيس جمهورية
عندك اهداف وخطط ما شاء الله تخلينا من افضل الشعوب عالميا
ياريت اللى فى بالى عندهم ربع تفكيرك وقناعتك
احترامى وتقديرى لشخصك الكريم

3:39 PM  
Blogger ايمان said...

لو كنت رئيس الدولة:
أولا سأبدأ بإنشاء الدولة أصلا ، فمصر فيما يبدو كما سرقوا عبده سرقوا منها أيضا الدولة، بمعني تأسيس ما يسمي بالدولة و التي تكمن سيادتها في القانون
ثم بعد ذلك انفذ مشروع محمد علي بدأ بالقلعة و ما تم فيها مع المماليك/ مع عدم اغفال أن غلطة محمد علي كانت ترك زوجاتهم حيث تزوجن فيما بعد من رجال الحكم الجديد و افرزوا لنا احفاد مماليك هذه الأيام

8:20 PM  
Blogger Mmm! said...

قوى جدا الرد على سؤال انك تبقى رئيس عجبنى بصراحة .. انما اللى خبطنى بدبشة الرد على نظرة الاجانب الاوروبيين ... تفتكر ده فعلا رد الفعل الوحيد منهم !!

9:11 PM  
Blogger bluestone said...

التاجات من الحاجات اللي بتضايقني فعلا
مش بحب اجاوب عليها في اغلب الاحيان
لانها بتكشف اكتر من اللازم

لكن السؤال الاول حلو فعلا
وبيدعو للتفكير
لو مكنتش مصري بس عربي ؟؟؟
يعني زي ما بيقولوا من نقرة لضحديرة
(مش عارفة مكتوبة صح كده ولا لأ)
على العموم .. اجابتي على سؤال زي ده هتكون مختلفة تماما ..
لن اقبل ان أكون إلا مصرية
من بلاد مغلوبة على أمرها بأمر من يحكموها ولكن إلي حين ..
فقط كبوة مؤقتة ..
وليحترق الشامتون برضه ..

9:39 AM  
Blogger lastknight said...

سمراء النيل
طبعا تايه .. و اناأيه اللى هايطلعنى القمر غير أنى أكون ركبت صاروخ غلط و انا كان أصلى اركب ميكروباص السلام .؟
مدونتك رائعه و بسيطه و عميقه .. زرتها و مازلت لا أجد وقت للتعليق .. لكن بأمر الله أقرأها بأمعان و أكون من زوارها الدائمين
شكرالأطرائك على الأجابات

4:14 PM  
Blogger lastknight said...

قطة الصحراء اللى كانت السبب
أن شاء الله مش هايحصلك حاجه وحشه .. و عموما أنا باشكرك على تمرير التاج لشخصى المتواضع .. و طبعا عندى خطه و برنامج و كل حاجه .. هيه .. هاتنتخبينى بقى ؟

4:16 PM  
Blogger lastknight said...

الدكتوره أيمان الراقيه
جبتى من الآخر .. و اعتقد مش مختلفين .. اعتقال أعضاء الحزب الوطنى هو مذبحة القلعه بطريقه حديثه .. و اعتقال أقربائهم حتى الدرجه الثالثه هو لتحاشى خطأ محمد على باشا .. شفتى بقى أنى باقرا تاريخ كويس ازاى ؟
شرفتينى .. و بانتظار كتابك عشان اعمله دعايا هنا

4:18 PM  
Anonymous Basma said...

فارس بيه
أنا لو كده هأنتخبك بصراحه
وعجبني موضوع البطاقه ده بكل المقاييس

كان عندي كام رد علي كام سؤال
أولا
لو قابلت الرسول عليه الصلاه والسلام هاكون عاوز بس أقوله أني نفسي يجي يفكر الناس أن ربنا أكبر من أي سلطه أو منصب وأن كلنا ميتين وربنا موجود

أما عن لو اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟
مره سالت طبيب صديق مقرب لوالدي السؤال ده قاللي لا حرام أن الشخص يقتل في نفسه غريزه ربنا زرعها فيه .. والاولاد رزق ونصيب لكن أختيار الحرمان صعب جدا

أما لو طلعت القمر فانا أكيد هترعب علشان أنا بحب الناس والعزوه والبلد رغم كل حاجه
تحياتي

11:30 PM  
Blogger lastknight said...

mmm
كويس ان عجبك ردى على سال الرئيس .. طيب .. هاتنتخبينى بقى ولا أيه ؟
مسألة الدبشه و رأى الأوروبيين فينا .. مش عاوز اصدمك أكتر و أقولك التفه دى هاتبقى رد المؤدبين فيهم .. الباقى عايعملوا حاجات أكتر
استشهد بحكايه قالتهالى عشتار مره .. كان عندها وفد أجنبى فى الشغل و مرت بيهم من جنب الأهرامات .. الراجل الخواجه سألها أنتى متأكده أن دى الأهرامات اللى بنسمع عنها ؟ يعنى مافيش أهرامات تانيه فى حته محترمه شويه ؟
الراجل مش مصدق أن البلد دى تحتوى على أهم أثر لحضاره قديمه فى العالم .. فعلا ,.. أتفو

12:15 PM  
Blogger lastknight said...

بلوستون الرقيقه
مرحبا بعد طول غياب .. و كده أشهد بأنك بريتى بوعدك
دحديره أو ضحديره الأتنين صح .. الكلمه أصلها مصرى عامى و ليس بالفصحى فتكتب كما تنطق
مسألة بقى التمسك بالجنسيه المصريه و الله ياستى كلنا فى الهم سوا .. لكن مسألة الكبوه دى .. مش شايفه أنها طولت شويه ؟
عموما عشان نكون فعلا مصريين لازم نشوف واقعنا صح الأول .. و ساعتها نقدر نبنى و نخطط صح
شرفتينى

12:18 PM  
Blogger lastknight said...

بسمتى السكندريه الرائعه
جميل .. كده ضمنت تلات أصوات فى انتخابات 2011 .. ربنا يسهل فى بقية التسعين مليون ( ماهو عدد السكان هايبقى كده فى ألفين و حداشر )عموما واضح أن الكل مخنوق من الحزب الوثنى و اللى منه
حرام عليكى .. الرسول عليه الصلاة و السلام ييجى تانى دلوقتى ؟ حرام عليكى تتعبيه مع الناس دى .. خسارته فيهم ..عليه الصلاة و السلام اتأذى من قريش مع أن ماكانش عندهم مباحث أمن الدوله ولا العادلى .. تخيلى بقى لو الداخليه عرفت ان عليه الصلاة و السلام جه تانى .. متخيله هايعملوا فيه أيه ؟ لا ياستى .. عليه الصلاة و السلام توفى ألى رحمة الله و استريح ..ماتتعبيهوش معانا بقى
لو طلعتى ىالقمر تترعبى ؟ ماتخلينيش اسيحلك بقى و اقولهم أنتى بتوصلى أول الصحراوى تقولى آه يا غربتى .. قمر أيه اللى بتفكرى فيه
شرفتينى

12:40 PM  
Blogger شغف said...

احم احم
لو فعلا وعودك مش مجرد وعود براقة لحد ما تتولى الحكم
يبقى ضمنت صوتي أنا كمان :)

بس ممكن تجاوب السؤال ده على ضوء بقية الأسئلة ؟

يعني احنا كعرب
كمصريين
كمسلمين
مش هأقول صورتنا زفت

لكن حقيقتنا نفسها كده

ايه في مخططك الانتخابي ممكن يغير من الحقيقة دي ؟

3:17 PM  
Blogger lastknight said...

شغف العزيزه الشرقاويه
أهلا وسهلا بيكى بعد غياب طويل , ثانيا كده ضمنت اربع خمس اصوات .. هانت .. فاضل على السبعين مليون الباقيين فركة كعب .. وعودى مش براقه .. و الدور الحقيقى على الشعب و رقابته عشان أى وعود ماتبقاش وعود بس .. لو رقابة الشعب اتفعلت صح .. الوعود هاتتحول لبرامج عمل .. الأحلام هاتتحول لخطط طريق .. لو الشعب قام بواجبه .. مش هايبقى فيه فرعون تانى .. هانلاقى السادات تانى بس قبل تعديل الهوانم .. هانلاقى ناصر قبل 1954 قبل ما يدفن الدستور .. هانلاقى الخديويى عباس حلمى تانى قبل ما يتجنن فى مخه و يغامر .. لو الشعب قام بدوره .. الوعود هاتتحول لعمل .. و ده يقودنا لسؤالك .. بس الأول اسمحيلى أنقح السؤال .. كمصريين و عرب و مسلمين .. خلينى الأول احذف آخر انتمائين .. العرب و المسلمين . احنا مصريين بس .. العروبه بالنسبه لنا لغه فقط .. ماخدناش منها غير أهانات فى الكويت و السعوديه .. و جثث طايره راجعه من العراق و طرد عمال من ليبيا .. حتى فلسطين .. الفلسطينى اللى عايش فى أسرائيل النهارده بيتعلم و يتعالج و يكسب أحسن بكتير من المصرى اللى عايش فى مصر .. بدليل الهجرات الشبابيه من مصر لأسرائيل

و الأسلام دين .. و رئيس مصر لازم يعرف أن الدين لله و الوطن للجميع .. مايفرقش يقف قدامه مسلم ولا مسيحى ولا يهودىى ولا ملحد .. اللى قدامه مصرى فقط .. يبقى السؤال .. نعمل أيه كمصريين عشان نرجع تانى ؟
أولا نقر و نعترف أننا فقط مصريين .. يعنى نتخلص من كل الأعباء الغبيه و الغيبيه اللى ضيعتنا .. ثانيا .. ننفتح مره تانيه على أوروبا .. و أوروبا فقط و ليس أمريكا و لا الصين ولا زيمبابوى .. أوروبا امتداد للحضاره المتوسطيه .. نبعت بعثات و نستورد أساتذه و علماء بدل استيراد الرقاصات اللى بدأناه من بعد انهيار الأتحاد السوفيتى
نتخلص من عقدة كراهية الغير و نتعايش مع الحضارات المغايره لحضارات البداوه اللى غرقتنا .. نرجع تانى منطقة جذب للأستثمارات و الأعمال و الصناعه و التجاره زى ما كنا قبل الله يحرقه عبد الناصر اللى جه طرد و شوه كل أصول الحضاره المتقدمه اللى كانت فيها مصر قبل ما يسلمها لأسرائيل بخيانته
نترجم بكثافه و نناقش بشغف و نقرا بحميميه .. نسمع موسيقى تانى .. نعاقب اللى يقول الفن التشكيلى حرام .. ندعم المسرح و السينيما اللى بجد .. نحط قدام عينينا هدف .. نحول أسلوب حياتنا من كل الجوانب لأسلوب منافس للأسلوب الأوروبى .. و عن أسرائيل ننافسها بقوه و عنف .. نحاربها فعلا .. بالمنافسه فى المجالات اللى تفوقت علينا فيها .ز اقتصاد تكنولوجيا حياه سياسيه شفافية أداء حكومى .. مع أعلان حرب التنوير ضد كل طيور الظلام ..من فاسدين حكوميين و غير حكوميين .. المغيبين من أدعياء الحق الألهى و داعيين للبداوه
بكده ممكن أن شاء الله يرجع وجه مصر ينور العالم تانى

تصدقى .. بافكر بجد أكتب برنامج انتخابى و انشره .. هاهاهاهاه
شرفتينى و ماتطوليش الغيبه تانى

3:53 PM  
Blogger عشتار said...

بصفتي فلسطينية أعيش هنا ربما السؤال الوحيد الذي أستطيع أن اتطرق الية هو رأيي كعربية في مصر
وهو من الأسئلة الصعبة جدا, فلا شيئ بديهي في بلد المتناقضات هذة وما زلت بعد عشرة سنين غير قادرة على حسم موقفي أو أحاسيسي تجاهها, فكثيرا ما تثير بنا مصر المزيج من المشاعر المتناقضة
ساعة نحبها ساعة نكرهها لكن أبدا لا يمكننا الوقوف لا مبالين امامها دائما بها ما يرعشنا وما يهزنا, ما يفرحنا او ما يحزننا
تمشي في شوارعها وأنت تصغي لدوي الحياة , لكن يبدو الأن وكأن هذا الدوي بات يخبو وتغرق البلد في حالة من التية والعشوائية والكأبة
سلام

4:00 PM  
Anonymous Anonymous said...

و ممكن كمان لو سمحت يعني و لو مافيهاش رزالة تصدر قانون بالقبض على كل الناصريين و الاخوان المسلمين و الاشتراكيين و الشيوعيين و اغلب اليسار و اليمين و التجمع و الوحدة و القومي
و بس
شكرا جزيلا

11:44 PM  
Blogger lastknight said...

رفيقة العقل و القلب عشتار
شكرا لتعلقك الودود على الموضوع الثقيل الدم الذى تورطتى فيه بحكم حبك لمصر ,عموما .. أوعدك لما أبقى رئيس اعينك سفيرة فلسطين فى القاهره .. هاهاهاه .. تخيلى أنتى و بسمه بتديروا علاقات ديبلوماسيه .. دى هاتبقى مسخره .. هاهاهاها

2:00 PM  
Blogger lastknight said...

المجهول
من يفعل ماقلت عليه هو خائن لهذا الشعب .. مااقترحته من سجن كل رأى معارض هو بالظبط مافعله الخائن عبد الناصر و الخائن صدام حسين و بعدهما الخائن القذافى .. طمعا فى مجد شخصى و خدمة لأسيادهم الأمريكان و الأسرائيليين
عفوا .. الحل خو التحرر .. الليبراليه .. كل مصرى له أن يعبر عن رأيه فى كل شىء .. كل شىء بلا استثناء .. فقط تحت مظلة قانون يحمى المجتمع من العنف و الأرهاب .. و أن قرر الشعب بأغلبيته أن يكون شيوعيا أو أخوانيا أو حتى ناصريا .. فسيكون هذا هو قرار الشعب .. و على من يعارض أن يحترم رأى الأغلبيه و يظل مخلصا لمعارضته
عفوا أيها المجهول .. ماقلته مشروع حيانه لهذا الشعب .. أرفضه طبعا

2:03 PM  
Blogger ذو النون المصري said...

الهنا ما اعدلك
مليك كل من ملك
............
لبيك قد لبيت لك
لبيك ان الحمد لك
............
و الملك لا شريك لك
ما خاب عبد سالك
...................
انت له حيث سلك
لولاك يارب هلك
..................
لبيك ان الحمد لك
و الملك لا شريك لك
.....................
كل نبي و ملك
و كل من اهل لك
...................
و كل عبد سالك
سبح او لبي فلك
................
لبيك ان الحمد لك
و الملك لا شريك لك
...................
و الليل لما ان حلك
و السابحات في الفلك
.................
علي مجاري المنسلك
لبيك ان الحمد لك
.........................
و الملك لا شريك لك
يا خاطئا ما اغفلك
....................
اعمل و بادر اجلك
و اختم بخير عملك
...............
لبيك ان الحمد لك
و الملك لا شريك لك
....................
هذه القصيده لشاعر الخمريات الشهير ابو نواس، احببت ان اهديها لكم بمناسبة وقفة عرفات و عيد لاضحي المبارك، كل عام انتم بخير ،تقبل الله منا و منكم طيب القول و صالح العمل
.........................

7:52 PM  
Blogger lastknight said...

ذو النون المصرى
كل عام و الكل بخير و طيبين
أشكرك للشعر الجميل
شرفتنى

11:47 PM  
Blogger ســردية said...

أولا كل سنة وانت واولادك بخير

عدم مطقية بعض الأسئلة تلتلزم بالطبع اجوبة غير منطقية


لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟
صحيح انا ألماني من سنوات طويلة لكن لو رجعت لن اكون إلا مصري فمقولة مصطفى كامل سليمة من حيث المبدأ لكن ليس على اساس شيفونيته لكن على اساس المنطق
هو فيه حد يرضى يكون عربي يا راجل؟
اما المصرية فهي اكثر أصالة لكنها منهوبة ومغيبة
ربنا يقصر غربتها

لوكنت أوروبي أو غير مسلم هتبقي إيه نظرتك للعرب والمسلمين؟

السؤال ده بتاعي

حتكون نظرتي للعرب كما أفعل اليوم ... من خلف جدار من الزجاج ومن بعيد لبعيد متفرج على أكبر كوميديا سوداء في التاريخ

لو قالوا لك إنت بقيت رئيس جمهورية هتعمل إيه؟

حستقيل فورا
معلش لم أعد أثق بهذه الأمة

لوسمح لك برؤية الرسول عليه الصلاة والسلام وإنك تقوله كلمة واحدة؟

مش حسأله زيك عن سبب نزول الرسالة على العرب لأن السؤال دة يُطرح على المُرسِل وليس على المُرسَل

ومدامت هي كلمة واحدة بس ، حقوله: باللاتينية : آلوتريا

لو كنا في عصر ازدهار الأندلس كنت تتخيل نفسك إزاي؟
أكيد حتلاقوني في صحبة ابن رشد
أو بصحبة صبية حلوة من صبايا أسبانيا
من عاش مثلي في اسبانيا حيعذرني

لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟

سيبك من الخطبة، لو بحبها بجد لن يؤثر ذلك في العلاقة

لو طلعت القمر هتكتب عليه ايه؟

حكتب: كراكاشنجي دبح كبشو يا محلا مرقة لحم كبشو... كل سنة وأنتم طيبين

12:44 PM  
Blogger whynot said...

( باعتبار أن قصة سلطانية مرزوق فى تاج الجزيره تمثل علامه فارقه فى تكوين وجدانى )

Wow ! never thought that we shared the same cultural folkloric resources !! ;) lol !

8:49 PM  
Blogger DantY ElMasrY said...

اسمحلى اجاوب هنا :
هاعتبرك سمحت واحاوب
1-هانظر للمصريين حسب جنسيتى ى فارس بالظبط مع اختلاف
يعنى لو اماراتى يبقى شفقة
لو سعودى يبقى غيظ
لو يمنى يهابقى عبيط
لبنانى لن أنظر مطلقا
فلسطينى هانظر بأمل
عراقى هانظر بحسد
تونسى ...شماتة
جزايرى ضحكة بدون سخرية
مغربى ....الحال من بعضه من شاف مصيبة غيره هانت علية مصيبته
ليبى امممممممممم
بين الأزهر والزيتونة مفازة يسكنها أوباش

2-نظرتى للعرب والمسلمين .انهم روبابيكيا لازم نتخلص منها انهم نفاية
وطبعا هايصعب عليا بعض القطع لكن هارميها او اطالب برميها
3- طول عمرى مستنى اليوم دا
ومخطط لكل حاجة
عفو عام عن السجناء السياسيين .أولا ثم دعوة جميع القوى الدينية والسياسية المعارضة بشكل رشمى -يعنى اللى عنده حزب وكلام من دا -الى مؤتمر عام فى استاد القاهرة -او الكلية الحربية مش هاتفرق وبعد ما يقعدو وقبل ما أوصل افجر المكان باللى فيه واتأكد ان الكل مات وبعدها الحياة هاتنضف
وابقى اشاور واحد زى فارس عن خططه والذى منه
3-أنا شفته فعلا بس مقدرتش اتكلم وهو ما كلمنيش بس لو جت فرصة يعنى هاسيبه هو يتكلم مش هاقول حاجة
4-فى عصر ازدهار الأندلس كنت هابقى اقل حاجة وزير
5-عادى .لو اكتشفت دا منها مش مشكلة
هاكمل بردك لأنى أكيد هاكون بحبها
ولو هى اكتشفت دا منى هاديها فرصة وان كنت متأكد من النتيجة
6-لو طلعهت القمر مش هاكتب حاجة لأنها أسوأ عادة مصرية -الكتابة على الآثار والمترو والحمامات العامة _لو شفت كتابة حد هامسحها
6-السؤال دا بايخ-مافيش اجابة وارفضه وأشجبه وأدينه

7:41 PM  
Blogger hurricane_x said...

فعلاً حاجة تكسف نظرة العرب لمصر والمصريين
كنّا فين وبقينا فين!
هو احنا كنّا فين صحيح؟

10:54 PM  
Blogger شريف الصيفي said...

أجمل الأمنيات بعام جديد تتمتع فيه أنت وعالمك بالصحة وفيض من الخير
وكل سنة وأنت طيب

4:05 PM  
Anonymous Anonymous said...

I don't get it. You say we should open up and connect to urope only not the US or China. Later you say, we should stop hating the others. Well, if we're going to open-up, we should not exclude the US or china, etc. out of hatred then.
Adel from Chicago!

12:44 AM  
Blogger ekraammalik said...

كنتم خير أمة أخرجت للناس

3:37 PM  
Blogger أنا إنسان said...

أخلاقنا...اسلامنا
إيمانا منا بأن حال العالم ...لم ولن ينصلح... إلا بالاسلام
وإيمانا منا بأن اسلامنا...لم ولن ينصلح ...إلا باأخلاق
اتفقنا...أو وفق الله بيننا ...لتكوين أول حملة للأخلاق...لتحقيقها...والسمو بها...والعمل بها بإذن الله
...................
من نحن
مجموعة من الشباب ...أهمهم حال أمتنا...وعروبتنا...وأوطاننا
فوفق الله بينناعلى الإجتماع على هذه الحملة...ولنطلقها حتى تصل إلى عنان السماء...علها تشفع لنا يوم القيامة
وبإذن الله ... سوف نعلن في البوست القادم عن المدونات والمواقع التي تدعم هذه الحملة
...................
وقد تم بحمد الله إنشاء مجموعة أخلاقنا إسلامنا البريدية على
yahoo groups
وسننشر بها ان شاء الله ما يتم انزاله من مقالات وفعاليات الحملة
وللاشتراك في الحملة...اضغط على الرابط التالي
http://groups.yahoo.com/group/akhlakona/
Group Email Addresses
Related Link
http://groups.yahoo.com/group/akhlakona/www.ana-insan.blogspot.com

1:35 PM  

Post a Comment

Links to this post:

Create a Link

<< Home