فارس قديم

احلام و أوهام و أمنيات .. أليست كل المبادىء كذلك ..؟ حتى أخلاقيات الفرسان

Name:
Location: cairo, Egypt

قد أكون أكبر المدونين سنا ..ما أكتبه هنا بدأته منذ سنوات فى دفاترى .. كتبت لنفسى .. و لأولادى حين يستطيعوا استيعاب ماكتبت .. رأيت أن لامانع من نشر بعض مافى الدفاتر .. فى حريه تااااامه

Thursday, November 23, 2006

اكرم ابنى .. بطل بجد

الحمد لله .. أخيرا خبر حلو فى الأيام الغريبه اللى عايشينها .. أكرم أبنى حصل على المركز الأول فى بطولة الجمهوريه المفتوحه للتايكوندو .. فى وزن تحت 49 كيلو ... الجميل بقى قصة مشوار الفوز .. أولا الأسبوع الماضى اكتشفت أنه مصاب فى رجله .. و كنت مرعوب عليه من التمرين قبل البطوله ..خوفا من تضاعف الأصابه .. لكن الحمد لله أصابته شفيت قبل البطوله بحوالى يومين .. نبهت عليه المره دى يركز كويس فى كلام المدرب .. و ماينفضلوش زى البطوله اللى فاتت و التى حصل فيها على المركز التالت بالعافيه .. ثانيا .. هو لعب أربع مباريات .. فاز فى الأولى بنتيجة عدم التكافؤ حيث فاقت نقاطه سبعة نقاط عن منافسه .. فى المباراه التانيه واجه زميله فى نفس الفريق .. و أعجبنى أنه قال من قبل المباراه كنت سعيدا بأى نتيجه .. فلو فاز هو أو فزت أنا فى النهايه النادى سيحصل على المركز .. فى المباراه الثالثه أيضا فاز بفارق خمس نقاط ..
أما المباراه الأخيره .. فكانت مع بطل نادى الجزيره .. و أعجبنى فى أكرم أنه اعتبرها مباراه ثأريه فبطل نادى الجزيره أخرج زميل أكرم بالضربه القاضيه فى دور الأربعه .. فاعتبر أكرم أن المباراه بينه و بين بطل الجزيره هى مباراة ثأر لصديقه .. و بالفعل نجح فى تسديد قاضيه فنيه لمنافسه فى الجوله الثانيه .. ألا أن التوقيت منع احتساب الضربه كقاضيه .. و فى الجوله الثالثه ضغط على منافسه ليفوز بفارق ستة نقاط كامله .. أى كانت تنقصه نقطه واحده ليتحول فوزه ألى فوز لعدم التكافؤ .. و بمجرد انتهاء المباراه .. و فوزه بالبطوله .. هرع ليهدى الفوز ألى زميله فى الفريق و الذى خرج من دور الأربعه و يقول له ماتزعلش .. أنا اخدت بتارك ..
فخور بتفوق أكرم رياضيا .. لكنى فخور أكثر بكثير بأخلاق الرجال التى تصرف بها و شرفه فى المنافسه .. و نبله فى معاملة اصدقائه و ايضا منافسيه
طبعا لم أحضر البطوله لظروف خاصه .. لكنى تابعتها على التليفون كل نصف ساعه تقريبا
الحمد لله .. و عقبال مزيد من الأفكار المفرحه

16 Comments:

Blogger tota said...

فارس
الله الله الف مبروك لاكرم البطل
تحية خاصة ليه ودايما يفوز ويكون فارس تصرفا وفعلا
فعلا خبر جميل نفرح بيه كلنا
تحياتى

12:13 AM  
Blogger alnadeem said...

ألف مبروك يا زعيم
عقبال ما نشوفه بياعب في الأولمبياد ان شاء الله
بلغه سلامي

2:36 AM  
Blogger Reformer1976 said...

ألف مبروك يا أبا أكرم
الولد طالع فارس كمان زي أبوه
التفاصيل في البوست أكثر من رائعة
اللي خلف مماتش يا وحش

ميزة برضه يا أخي البرجوازية في مرات... يعني لو انت كنت بروليتاريا زي حالاتنا عمر ما كانت اللحمية التاريخية هتودي الواد نادي محترم يتعلم فيه الأخلاق الرياضية قبل الرياضة نفسها
كان ساعتها هيبقى آخره مركز شباب "ناصر"ـ
وكان ساعتها أسماء منافسيه تتراوح ما بين حموكشة وأشرف كخة وعلى علوكة
تدفع لي كام وابقى بورجوازي وإمبريالي كمان؟؟؟

هههههههههههههه

5:59 AM  
Blogger Rasha said...

الف مبروووووووووووووووووووووووك
عقبال ما يفرحوك كمان وكمان يا رب يخليهم ليك
سلام الى اكرم اوي
والى ابو اكرم الي خلف فرسان بشجاعتهم وباخلاقهم

يارب كل ايامك هنا واخبار جميلة يا احلى فارس واحلى اب في الدنيا

(F)

12:11 PM  
Blogger عشتار said...

ألف مبروك
وسعيدة جدا ان اكرم كسب عشان انت كنت خايف وتقريبا متأكد انة مش حيكسب , بس احنا قلنالك من الأول انة ذاك الشبل من ذاك الاسد
الف مبروك وعقبال البطولة العالمية
تحيات

12:18 PM  
Blogger lastknight said...

السمراء الرائعه توتا
الله يبارك فيكى .. يارب نلاقى أخبار كويسه تانيه قريب فى الزمن الهباب اللى عايشينه ده
________________________________
الرئيس المفدى عمر قناوى
الله يبارك فيك يا ريس .. و افتكر بقى لما تمسك الحكم تدعم اتحاد التايكوندو شويه .. بتوع الكوره واكلينها والعه .. و الألعاب التانيه اللى مصر فالحه فيها مش لاقيين يسفروا اولادهم
و عقبال ماتفرح بنور وريث العرش
___________________________________
الحاج جرجس ..
الله يبارك فيك .. يابنى هى البرجوازيه دى بالساهل ؟؟ مبدئيا تبطل راس العبد ..و تتنصل من مبادىء الرئيس المفدى عمر قناوى عشان هو فقرى ..ثالثا تشوفلك شغلانه غير حلاق الصحه بتاعتك دى .. و ساعتها لوحدك هاتبقى بورجوازى
الأمبرياليه فى مرحلة أعادة بناء أمه عريقه كالأمه المصريه قد تكون حتميه تاريخيه .. فاهمنى طبعا .. نتكلم أكتر لما نتقابل .. بس برضه مش هاستغنى عن حدود القطر المصرى الأصليه قبل ما يمسكها المهزوم عبد الناصر
__________________________________
الجميله رشا
الله يبارك فيكى .. و أنا عارف أنك عاوزه تتجوزيه .. أدينى عنوانك ابعتهولك دلوقتى .. و اشربى بقى .
ربنا يرزقك أنتى كمان بأولاد نسانيس عشان تعرفى المعاناه
و تعملى حسابك المره الجايه فى القاهره تقابليه
_________________________
رفيقة القلب و العقل .. عشتار
فعلا .. كنت بجوارى فى مخاوفى .. و ألان بجوارى فى الفرح .. لا أتمنى من الله أكثر من أن يديم علينا نعمة الصداقه الحقيقيه التى فاقت فى قوتها علاقة الأخوه
دمت لى يا عشتار

12:31 PM  
Blogger ekraammalik said...

مبروك والف تهنئة... هذه المرة الثالثة اللي اكتب فيها تعليقي وافشل في نشره يارب هذا التبريك يوصلك

5:31 PM  
Blogger شــهــروزة said...

مبرووووووك
ألف مبرووك البطولة يا بطل
وعقبال بطولة العالم والاولمبياد ان شاء الله

قال بيتابع بالموبايل قال
بقا يا عم الحاج مش تروح كدة وتمسك طبلة كبيرة وتلون وشك بعلم النادى وترفع يافطة مكتوب عليها اسم أكرم
وتقعد فى الصف الاولانى؟؟؟

روح كدة وانت تجيب احباط

مبرووك يا أكرم
كنت عزمتنا يا راجل كنت جبتلك كل ولاد الحى عندنا يشجعوك ومن غير فلوس كمان

بس انت قدها وقدود


فين الساقع والجاتوة؟؟
الحلاوة يعنى

6:03 PM  
Blogger Rikka said...

الف الف مبروك يا فارس .. و مبروك ليك يا اكرم .
طبعا زعلتني انك مش حضرت معاه .. بس انشاء الله تحضر معاه المرة الجاية و دايما يكون مشرفنا و رافع راسنا .. و اكيد لما انزل مصر ليا عندك الحلاوة انا و شهروزة و كل الناس و كمان عشان نشوف البطل صاحب الأخلاق العالية ... ربنا يبارك لك فيه يا رب هو و اخته .

8:45 AM  
Blogger bluestone said...

ربنا يخليهولك
ويسعد أيامه وقلبه ويفرحك بيه
وتشوفه دايما الراجل اللي بتحلم انه يكونه فعلا ...

راجل وليس ذكر
وقبل كل شيء إنسان بجد

1:01 PM  
Blogger yasser_auf said...

و اخيرا ظهر حد عدل في عيلتكم بياخد بطولات او بيكسب الف مبروك لاكرم و يا ريت تتعلم من ابنك هاهاها
طبعا الناس كلها بتسائلك لية مرحتش و متابعها علي الموبيل ( البطولة )محدش يعرف انك لو كنت رحت كنت قابلت والدة اكرم و كان الموجودين حيتفرجوا علي متش من نوع تاني بطولة تايكوندوا مع وصلة ردح علي شد شعرو ابو وردة يطلع و نفك الملاية اللف يعني من الي في العادة بتنتهي بالقسم و علاج اكتر من 21 يوم لحضرتك طبعا عموما حصل خير اسواء ما في الانفصال ان موش احنا الي بندفع الثمن ناس تانية هي الي بتدفع الثمن و لاكن برغم كل مساؤا الطرف الاخر او خلافاتك معه فالف تحية ليها مع اكرم حيث انها في ظل الظروف الحالية استطاعت ان تضع ابنها علي الطريق السليم
يمكن فشلت معاك ولاكن اظن انها نجحت مع نور و اكرم بالرغم كل خلافاتك معها و انا كمان الا انة من الواجب مع سيل التهاني ليك و لاكرم ان نرسل لها شكرا علي تعبك مع اكرم و نجاح تربيتك ووضعة علي الطريق السليم و ان شاء الله تشوفية احسن واحد في الدنيا .... و لبيبو الف مبروك لاكرم و الحمد الله انة موش معاك و الا كانت زمانة موش بطل تاكوندوا لا كان حيبقي زمانة بطل الاقسام والساحات الشعبية و صورتة مطلوب في كل لوحة اعلان في كل قسم لانة ضارب عشرة مثلا

2:36 PM  
Blogger lastknight said...

العراقيه الجميله
الله يبارك فيكى .. و عقبال ماتبعتيلنا أخبار حلوه من عندكم أنشاء الله
_____________________________
شهروزه الجميله
الله يبارك فيكى .. و الله عدم تواجدى فى البطوله كان لسببين .. أولا وجود والدة أكرم معاه .. و أخاف وجودى يشتت تركيز الولد .. ثانيا والدتى اتعرضت لأزمه صحيه يوم الخميس ..اضطريت أفضل معاها ..
و ياستى شايلينك أنتى وولاد الحى للتقيله ..بطولة العالم بأمر الله
________________________
ريكا الراقيه
الله يبارك فيك .. و الف شكر و تشرفينى أنتى و شهروزه و كل الحبايب .. بس اغلطوا و اعملوها
_______________
القهوه الغاليه .. عقبال ماتفرحينا بأخبار من عندك .. و ألف شكر
مش هانتجوز بقى ؟
________________________
أخى الحبيب ياسر عوف
و الله عندك حق و عداك العيب .. أم أكرم تستحق الشكر طبعا .. و عن نفسى ممنون منها جدا لحسن تربيتها فى أولادى
مشاكلنا طبيعيه لكن على أيدك أنا باحاول قدر الأمكان ما أحسسش الولاد بحاجه .. و اعتقد الحمد لله نجحت فى كده ألى حد كبير
و ياسيدى عقبال ماتفرحنا بمحمود أنشاء الله

8:48 PM  
Blogger epi said...

الف الف الف مبرووووووووووووك

انا اسفة جدا جدا اني اتأخرت في قراءة الخبر الجمييييييييييييييييييييل جدا جدا ده
ماشااء الله

ربنا يحميه يا رب

انا فعلا حسيت بفرحة بجد كبييييييييرة جدا

طب و الله انا الدموع كانت في عيني
دموع الفرح طبعا

مافيش احلي من النجاح
وانك تفرح باولادك دايما يا رب

ربنا يفرحك بيهم دايما

سلامي اليه
و اقوله ليا اختي الصغيرة بتلعب كاراتيه بس علي قدها
و ليها مستقبل ان شاء الله
;)

فين الشربات صحيح؟
:) علي حساب عم الحاج جرجس؟؟

9:36 PM  
Blogger lastknight said...

حبيبة قلبى الصغننه
شكرا يا ست الكل و عقبال مانباركلك بالعريس أنشاء الله
شربات على حساب جرجس ده أيه ؟ هو لاقى ياكل ؟
أنتى بس قوليلى هاتشرفينا أمتى فى المكتبه .. و أجيبلك شربات و جاتوه و بلالين كمان

10:01 PM  
Blogger sherry bahi said...

alf mabrouk ya fares ya qaddim ,, we shaklena keda fe 2entezzar fares gedid ,,ana ma zelt 3and ra2yi 2enak fares 3ariq mesh qaddim bas ana ha2olak ya fares ya qaddim bas 3alachan mab2ash kassart kelmetak ,,

5:09 AM  
Blogger lastknight said...

الصديقه الصدوقشيرى باهى
الله يبارك فيكى .. و عقبال مانفرح بيه و هو بيتجوز الأموره بنتك

5:00 AM  

Post a Comment

Links to this post:

Create a Link

<< Home