الممارسات البيطريه فى السياسه المصريه

بعد محاضره فى الأكاديميه .. أنخرطت فى مناقشه مع زملائى من قسم الأداره العامه حول نظرية الحوكمه و أعادة ابتكار الحكومه .. و أعادة تعريف وظيفة الحاكم .. مناقشه دمها تقيل .. و انا اساسا لا أحب الأداره العامه من صغرى .. فهى نظريه تجريبيه بحته على عكس أدارة الأعمال الدوليه التى أتخصص فيها .. علم اقرب مايكون للتطبيق العملى و مابه من أثارة المخاطره و الحسابات و التقديرات المنطقيه ..المهم أنهيت المناقشه نحو العاشره مساء , الوقت متأخر جدا لدعوة رفيقه العقل و القلب عشتار .. و اصدقاء العمل كلهم مكتئبين بسبب أحوال السوق الأقتصاديه حاليا .. تعمل ايه يافارس تعمل أيه يافارس ؟

الرئيس المفدى عمر قناوى و تابعه جرجس .. صحيح هم بلوريتاريا و مش من مستوايا .. لكن معلش .. أهو ساعات الواحد لازم يختلط بطبقات الشعب دى .. استحمل شويه و اكلمهم

أنت فين ياعمر ؟

فى الحريه مع جرجس

طبعا متلقحين من تلات أيام .. هاتروحوا فين يعنى ؟ هو فيه حته تانيه تلمكم يا جعانين

بطل طولة لسان و تعالى

ماشى

لقاء حميم بين الأصدقاء .. طبعا جرجس ماسك اللاب توب و فاتحه بيتمنظر قدام البنات كأنه يعنى فاهم حاجه .. و عمر بقى صحفى مشهور و كل شويه يقوم يكلم ناس مانعرفهاش .. و اسأله مين ده ؟ يرد باقتضاب .. شغل

طيب ياسيدى .. شغل شغل عموما أهى ليله و السلام .. الحديث المعتاد عن الهم المشترك .. تريقه على عمر عشان زملكاوى .. دعوه من الأتنين ( اللى هم بلوريتاريا مخدوعين ) لحضور مظاهره غدا فى ذكرى ما أسموه انتفاضه شعبيه .. و رفض حاسم منى مع كلمتين قباحه أولا لأنها انتفاضة حراميه .. و لو كان الشعب ده بينتفض من غير وسوسه من شياطين اليسار أو الميديتشيات المعاديه للمصرين الحقيقيين أمثال الشهيد السادات .. لكان الشعب عمل تسعين انتفاضه زيها بسبب غلاء الأسعار فى عهد الجحش العجوز الحالى .. ثانيا لأن الداعى للمظاهره هم حركة كفايه التى مازلت أرى مدها و جزرها مرتبط ارتباط وثيق بحركة السمراء القبيحه .. كوندوليزا رايس

لا ياسيدى يفتح الله مش جاى مظاهرات

يعنى أنت تقعد تناضل بقيقى بس و ساعة المظاهره تقول مش لاعب؟ ( ده المسحوب من لسانه عمر قناوى )و

انا مش مقتنع بالفكره .. ولا بالمنظمين

أنت أى حد يعارضك يبقى عميل و خاين ( ده المسحوب من لسانه التانى جرجس الله يحرقه ) و

كلمه منهم و كلمه منى

ينبرى عمر قناوى لينطق جمله كأنها أذن بالأفراج عن أحدى أفكارى الخفيفه نسبيا فى السياسه المصريه .. قال عمر قناوى : كانت النظريه تقول الضغط يولد الأنفجار .. مايحدث من الشعب المصرى حاليا أثبت أن الضغط .. لاينتج عنه شىء

ليله باينه من أولها .. أشرحلهم الفكره .. يأتى اقتراح أن أكتبها .. و ها أناذا أكتبها بعد سويعات من اللقاء الجميل مع صديقين فخور بأنهما اصدقائى .. رغم أنهم جعانين

___________

البيطره هو اللفظ المعرب للكلمه الفارسيه بيزره , و المعنى بها هو علم رعاية البياز .. جمع باز .. و أصل الباز هو الصقر المدرب على الصيد , و لشيوعه صار أسم باز يطلق على كل كاسر أو حيوان يسخدم بعد تدريبه فى الصيد و القنص .. فصارت الجياد و الكلاب فضلا عن الصقور و الحداء كلها تسمى بالبياز .. و صار علم علاج الحيوانات هو البيزره .. و بطبيعة الحال لا يستدعى العربى طبيبا متخصصا لعلاج حيوان بسيط القيمه كالأغنام أو الدواجن فيكفى ذبح الحيوان بسرعه بمجرد أصابته بالمرض و قبل موته .. بينما قيمة البياز تغرى بتخصيص طبيب لعلاجها و تدريبها و الحفاظ عليها .. و من هنا كانت البيزره علما للخاصه المقربين من الملوك و الأمراء أصحاب البياز .. و تعرب اللفظ ألى بيطره المفهوم منه حاليا طب الحيوانات عموما

الفلاح مثلى و مثل أهلى قد يلم ببعض أساليب البيطره الشهيره للعنايه بالحيوانات المرتفعة القيمه نسبيا , و من أشهر و أعجب الدروس التى تعلمتها يوما فى صغرى عن الجياد .. هى أن اسوأ مايصيب الحصان هو كسر قصبة ساقه بطريقه اسمها الشوكه .. أى كسر عضمة القصبه من تحت الركبه بحيث تبرز العضمه المكسوره من الجلد كأنها شوكه كبيره .. هذه الأصابه مميته للحيوان لأنها مؤلمه جدا و تؤدى بعد سويعات من حدوثها لوفاة الحصان متأثرا بالصدمه العصبيه نتيجة الألم الحاد .. و بطبيعة الحال هذه الأصابه قد تحدث للجواد فى منطقة برارى بعيده عن العمران .. بحيث يصعب جدا نقل الحيوان فى وقت مناسب لعلاجه عند طبيب متخصص يستطيع تخديره قبل وفاته من صدمة الألم العصبيه , و أيضا فأن أى محاوله لرد العضمه المكسوره مكانها تسبب ألم أكثر حده للحصان مما يعجل بصدمته و بالتالى وفاته .. و ضياع ما تم استثماره فيه تماما ..

أذا المشكله فى حالة حدوث هذا الكسر المأسوى هى الألم الذى يعانى منه الحصان و ليس الكسر نفسه .. فلو نجا الحصان ذو الجهاز العصبى المرهف من صدمة الألم لأمكن تجبير الكسر و الأستفاده من الحصان و لو فى التكاثر فقط اذا فقد قدرته على الجرى , و عليه .. علمنى القدماء أن الأسلوب الأمثل لعلاج هذه الحاله هو مايسمى بالبلدى ( قمطة الودن ) و هى عباره عن عصا غليظه مربوط فى طرفيها حبل سميك خشن على شكل قوس .. يتم لف الحبل على أذنى الجواد المكسور و هو على الآرض يتألم من ساقه .. ثم بغلظة قلب ضروريه ساعتها يبدأ لف العصا دائريا كأنها عتله لتشديد ضغط الحبل السميك الخشن على أذنى الحصان الجريح .. و يستمر لف العصا بلا رحمه لتنجذب أذنى الجواد لأعلى عكس اتجاههما الأصل .. حتى أن جلد جمجمة الحصان كله يتم شده مع شد الأذنين .. مزيد من الشد ( المسمى بالقمط بالفلاحى )حتى يتغير شكل عيون الحصان من شد جلد جمجمته ووجهه .. مزيد من الشد المؤلم لأذنى الحصان حتى يبدأ فى تحريك رأسه محاولا الهروب بأذنيه الداميه التى تكاد تقطع من شدة الضغط عليها , و هنا فقط يفهم الفلاح أن الحصان بدأ يشعر بالألم فى اذنيه .. فيقوم بسرعه برد العضمه المكسوره فى ساقه بجذب الساق للخارج و أعادة العظمه البارزه ألى مكانها الأصلى استعدادا لتجبيرها لا حقا ..

النظريه علميه حقيقيه .. صرف الألم بألم أشد منه فى مكان آخر من كيان الكائن الحى .. و لها اسم علمى لا أذكره و أترك ذلك لأصدقائى توتا و جرجس بحكم تخصصهما .. لنراجع الآن بعض أجراءات الحكومه المصريه فى عهد الجحش العجوز .

زيادة أسعار الأدويه مؤلم , و أكثر من ألمها زيادة اسعار البنزين , لكن التحرش الجنسى الجماعى أكثر أيلاما .. و فى موضع آخر أكثر حساسيه .

سجن طلع السادات و أيمن نور مؤلم .. لكن ايضا حديث فاروق حسنى عن الحجاب هو ألم آخر فى مكان آخر

التعديلات الدستوريه مؤلمه .. لكن طلبات الأحاطه عن فيلم الرهينه و نية الأخوان تأسيس حزب سياسى و ذكرى مظاهرات يناير مؤلمه ايضا .. لكن فى موضع بعيد عن الدستور و تعديلاته

و هلم جرا

و حتى لا يتهمنى أصدقائى الأحباء بأنى أقفل الموضوع ولا مجال للتعليق عليه .. أترك الباب مفتوحا للجميع للمشاركه بمايذكرونه من أحداث مماثله .. أى أحداث مؤلمه غطت على و صرفت النظر عن أحداث أخرى مؤلمه ايضا

و أعلن عن جائزه قدرها جنيه لأكثر للمدون اذى يذكر أكبر عدد من الأمثله

بدأت المسأله بنظرية الرعويه و القطعان , مرورا بالفرخه و الوزه و الحمامه .. و الآن الخيول المكسورة السيقان .. مش فاهم ايه الحظيره السياسيه اللى أنا باكتب منها دى ؟